इकबाल शेख यांनी वरिष्ठ पोलिस अधिकाऱ्यांना केले मार्गदर्शन
इकबाल शेख यांनी वरिष्ठ पोलिस अधिकाऱ्यांना केले मार्गदर्शन
सोलापूर (प्रतिक भोसले) – सोलापूर ग्रामीण पोलीस दलात कार्यरत असलेले इकबाल शेख, पोलीस हवालदार सीसीटीएनएस विभाग यांनी सीसीटीएनएस प्रणाली मध्ये आजतागायत उत्कृष्ट कामगिरी करून महाराष्ट्र व भारत देशात सोलापूर ग्रामीण पोलीस दलाचे नाव लौकिकास आणले आहे. तसेच महाराष्ट्र पोलीस दलातील अनेक पोलीस अंमलदार व पोलीस अधिकारी यांना सीसीटीएनएस व गुन्हे प्रकटीकरणांमध्ये सीसीटीएनएस तसेच इतर केंद्र शासन व राष्ट्रीय गुन्हे अभिलेख केंद्र (NCRB) यांचेकडून गुन्हे प्रकटीकरणासाठी भारतीय पोलीस दलास उपलब्ध करून दिलेल्या अनेक पोर्टल्सबाबत सुद्धा मोलाचे मार्गदर्शन केलेले आहे.
या मध्ये महाराष्ट्र पोलीस दलात नव्याने रुजू झालेले आणि सध्या महाराष्ट्र पोलीस अकॅडमी नाशिक येथे प्रशिक्षण घेत असलेल्या 15 नवप्रविष्ठ पोलीस उप-अधीक्षक व 830 नवप्रविष्ठ पोलीस उप-निरीक्षक (सत्र क्र.123 व 124) दर्जाचे पोलीस अधिकारी यांचे प्रशिक्षण सुरू असून लवकरच सर्व अधिकारी दि.05जानेवारी 2024 रोजी एक वर्षाच्या खडतर प्रशिक्षण पूर्ण करून महाराष्ट्र पोलीस दलामध्ये आपली सेवा बजावण्याकरिता रुजू होणार आहेत. पोलीस उप-अधीक्षक व पोलीस उप-निरीक्षक दर्जाचे वरिष्ठ पोलीस अधिकारी यांना सीसीटीएनएस या महत्त्वाच्या विषयावर मार्गदर्शन करणे करीता तज्ञ व्याख्याते म्हणून इकबाल शेख यांना महाराष्ट्र पोलीस अकॅडमी, नाशिक येथे आमंत्रित करण्यात आले होते. सदर व्याख्याना दरम्यान इकबाल शेख यांनी प्रशिक्षणार्थी पोलीस अधिकारी यांना “गुन्हे प्रकटीकरणासाठी सीसीटीएनएस प्रणालीचा उपयोग व इतर शासकीय विभागांशी सीसीटीएनएस प्रणालीचा समन्वय” या विषयांवर मोलाचे मार्गदर्शन केले.
या वेळी त्यांचा सचिन गोरे, पोलीस अधीक्षक तथा उपसंचालक (बाह्यवर्ग), जयंत राऊत, पोलीस उप-अधीक्षक तथा उप संचालक, श्रीमती सिमा परिहार, पोलीस निरीक्षक तथा सहाय्यक संचालक व विजय तलवारे, पोलीस निरीक्षक तथा सहाय्यक संचालक, बावीसकर, पोलीस निरीक्षक तथा सहाय्यक संचालक महाराष्ट्र पोलीस अकॅडमी, नाशिक यांचेकडून पुष्परोप देऊन सन्मान करण्यात आला.
