मुंबई पोलिस आयुक्त विवेक फणसाळकर नंतर कोण होणार मुंबई पोलिस आयुक्त ??
मुंबईचे पोलिस आयुक्त विवेक फणसाळकर हे उद्या दि.३० एप्रिल रोजी सेवानिव्रुत्त होताय,त्याअनुषंगाने त्याचेजागी कुणाची नियुक्ती होते की त्यांनाच मुदतवाढ मिळते हेही महत्वाचे…
मुंबई(प्रतिनिधी) – मुंबईचे पोलिस आयुक्त विवेक फणसळकर हे उद्या, बुधवारी सेवानिवृत्त होत असून त्यांच्या जागी कुणाची वर्णी लागणार, याकडे संपूर्ण पोलिस दलाचे लक्ष लागले आहे. महाराष्ट्र पोलिस गृहनिर्माण आणि कल्याण महामंडळाच्या व्यवस्थापकीय संचालक अर्चना त्यागी, सेवाज्येष्ठतेमध्ये पहिल्या क्रमांकावर असलेले कायदेशीर आणि तांत्रिक विभागात कार्यरत असलेले संजय कुमार वर्मा, राष्ट्रीय तपास यंत्रणा (NIA) ची धुरा सांभाळणारे सदानंद दाते यांची नावे आयुक्तपदाच्या स्पर्धेत आहे. मुंबईच्या विशेष पोलिस आयुक्तपदी विराजमान असलेले देवेन भारती यांचे नावही आयुक्तपदासाठी चर्चेत असल्याचे म्हटले जात आहे.
मुख्यमंत्री आणि गृहमंत्री देवेंद्र फडणवीस यांचे हस्ते काही दिवसांपूर्वी मुंबई पोलिसांच्या विविध इमारती आणि योजनांचा शुभारंभ पार पडला. यावेळी त्यांनी विवेक फणसळकर निवृत्त होत असले तरी त्यानंतरही त्यांना काम करायचे आहे, असे वक्तव्य केले होते. त्यावेळी फणसाळकर यांना मुदतवाढ मिळणार का? याबाबत सुरू झालेली चर्चा आजही सुरू आहे. त्यातच त्यांना मुदतवाढ न मिळाल्यास आयुक्तपदी कोण विराजमान होणार याबाबत वेगवेगळ्या चर्चा आणि अंदाज पोलिस दलात बांधले जात आहेत.
पोलिस सेवेतील ज्येष्ठतेनुसार १९९० च्या बॅचचे भापोसे अधिकारी संजय कुमार वर्मा हे आयुक्तपदासाठी प्रबळ दावेदार मानले जात आहेत. एप्रिल २०२८ मध्ये निवृत्त होणार असलेल्या संजय कुमार वर्मा यांनी नोव्हेंबर २०२३ मध्ये काही काळासाठी पोलिस महासंचालक म्हणून काम केले होते.
त्यांच्याच तुकडीचे असलेले आणखी एक भापोसे अधिकारी सदानंद दाते यांचेही नाव चर्चेत आहे. सध्या केंद्रीय प्रतिनियुक्तीवर असलेले सदानंद दाते हे NIA चे प्रमुख आहेत. दहशतवादी तहव्वूर राणा यांच्या प्रत्यार्पणामध्ये दाते यांनी महत्त्वाची भूमिका बजावली. २६/११ च्या दहशतवादी हल्ल्यांचा तपास करणाऱ्या या अधिकाऱ्याने प्रत्यक्षात हल्ल्यादरम्यान दहशतवाद्यांशी दोन हात केले होते.
त्याचप्रमाणे महिला अधिकारी म्हणून १९९३ च्या तुकडीच्या भापोसे अधिकारी अर्चना त्यागी या प्रबळ दावेदार आहेत. मुंबईच्या आयुक्तपदी पहिल्या महिला अधिकारी म्हणून शासनाच्या वतीने अर्चना त्यागी यांची नियुक्ती केली जाऊ शकते. पोलिस महासंचालक पदावर रश्मी शुक्ला या महिला अधिकारी असल्याने सध्या महाराष्ट्र पोलिस गृहनिर्माण आणि कल्याण महामंडळाच्या व्यवस्थापकीय संचालक म्हणून काम करणाऱ्या अर्चना त्यागी यांना महिला म्हणून आयुक्तपदाची जबाबदारी दिली जाण्याची शक्यता व्यक्त केली जात आहे.
