परभणीत दरोड्याची तयारी करणारी आंतरजिल्हा टोळी जेरबंद; ४.५७ लाखांचा मुद्देमाल जप्त

परभणीत दरोड्याच्या तयारीतील आंतरजिल्हा टोळी जेरबंद; ४ लाख ५७ हजारांचा मुद्देमाल जप्त, स्थानिक गुन्हे शाखेची धडक कारवाई

परभणी: परभणी जिल्ह्यात वाढत्या घरफोडी व चोऱ्यांच्या घटनांना आळा घालण्यासाठी जिल्हा पोलीस प्रशासनाने कठोर पावले उचलली आहेत. याच पार्श्वभूमीवर, परभणीच्या स्थानिक गुन्हे शाखेच्या (LCB) पथकाने जिंतूर रोडवरील पाथरी बायपास परिसरात मोठा दरोडा टाकण्याच्या तयारीत असलेली आणि बनावट नोटांच्या साहाय्याने फसवणूक करणारी एक खतरनाक आंतरजिल्हा टोळी जेरबंद केली आहे. या कारवाईत पोलिसांनी ५ आरोपींना अटक करून त्यांच्याकडून एकूण ४ लाख ५७ हजार ५५० रुपयांचा मुद्देमाल जप्त केला आहे.

घटनेची पार्श्वभूमी व कारवाईचा घटनाक्रम

परभणी जिल्ह्यात घडणाऱ्या घरफोडी व चोरीच्या घटनांच्या पार्श्वभूमीवर, पोलीस अधीक्षक पंकज कुमावत आणि अप्पर पोलीस अधीक्षक तानाजी चिखले यांनी स्थानिक गुन्हे शाखेला कठोर कारवाईचे निर्देश दिले होते.

त्यानुसार, पोलीस निरीक्षक  गजेंद्र सरोदे यांच्या मार्गदर्शनाखाली LCB चे पथक परभणी शहरात गस्त (पेट्रोलिंग) घालत असताना, त्यांना गोपनीय बातमीदाराकडून अत्यंत महत्त्वाची माहिती मिळाली. जिंतूर रोडवरील पाथरी बायपास परिसरातील पुलाजवळ काही संशयित इसम तोंडाला पांढरा रुमाल बांधून, हातात तलवारी व लोखंडी शस्त्रे घेऊन येणाऱ्या-जाणाऱ्या वाहनांवर दरोडा टाकण्याच्या तयारीत उभे आहेत.

माहिती मिळ Fi सह LCB च्या पथकाने तातडीने सापळा रचून धर्मापुरी शिवारातील जिंतूर ते पाथरी बायपास रोडवरील पुलाजवळ रात्री २२.०५ वाजता छापा टाकला. अंधारात एक संशयित Hyundai i20 कार थांबलेली आढळली. पोलिसांनी अत्यंत शिताफीने व धाडसाने कारवाई करत पाचही जणांना जागेवरच ताब्यात घेतले.

जेरबंद करण्यात आलेले संशयित आरोपी

अटक करण्यात आलेल्या पाचही आरोपींची पार्श्वभूमी पाहता ही एक आंतरजिल्हा गुन्हेगारी टोळी असल्याचे समोर आले आहे:

१. गजानन तुळशीराम इंगळे (वय ४२ वर्षे, रा. गोपाळनगर, खामगाव, ता. खामगाव, जि. बुलढाणा)

२. केशव अभ्याजी सरोदे (वय ४५ वर्षे, रा. आकोला नाका, मालेगाव, ता. मालेगाव, जि. वाशिम)

३. किशोर वामन कांबळे (वय ५० वर्षे, रा. सिरपूर जैन, ता. मालेगाव, जि. वाशिम)

४. पवन ओमप्रकाश चौधरी (वय ४२ वर्षे, रा. शिवाजी वेस, खामगाव, ता. खामगाव, जि. बुलढाणा)

५. योगेश पद्माकर भोज (वय २७ वर्षे, रा. जालंब नाका, डीपी रोड, खामगाव, ता. खामगाव, जि. बुलढाणा)

चौकशीत धक्कादायक खुलासे: दरोडा आणि बनावट नोटांचा खेळ

पोलिसांनी कसून चौकशी केली असता, या आरोपींनी अनेक धक्कादायक गुपिते उघड केली.

• लुटमार व घरफोडीची योजना: आरोपी बायपास रोडवरून प्रवास करणाऱ्या वाहनचालकांना अडवून लुटमार करण्याच्या आणि रात्रीच्या वेळी शहरात घरफोडी करण्याच्या उद्देशाने तेथे जमले होते.

• बनावट नोटांचा फंडा: लोकांची फसवणूक करण्यासाठी त्यांच्याकडे ‘भारतीय बच्चों के बँक’ अशा खेळातील खेळणी नोटा आढळून आल्या. या बंडलच्या वरच्या व खालच्या बाजूस खऱ्या भारतीय चलनी नोटा लावून, गरिब किंवा भोळ्या लोकांना खऱ्या नोटांचे भासवून फसवणूक करण्याचा त्यांचा प्लॅन होता.

जप्त करण्यात आलेला मुद्देमाल

पोलिसांनी आरोपींकडून गुन्ह्यात वापरलेली साधने व रोखड असा मोठा मुद्देमाल जप्त केला आहे:

• सिल्वर रंगाची Hyundai i20 कार: किंमत अंदाजे ४,००,०००/- रुपये

• वाहनाच्या नंबर प्लेट्स: ०२ नंबर प्लेट (MH 03 BE 7219)

• हथयारे व इतर साहित्य: एक धारदार तलवार, लोखंडी रॉड, स्क्रू ड्रायव्हर, मिरची पूडच्या ५ पुड्या, दोरी आणि रोख २५००/- रुपये.

• मोबाईल हँडसेट: ४८,०००/- रुपये किमतीचे ०८ मोबाईल (सैमसंग, ओप्पो, मोटोरोला, विवो, के-टच कंपन्यांचे).

• बनावट नोटा: ‘भारतीय बच्चोका बँक’ लिहलेल्या खेळणी नोटांची बंडल.

• एकूण जप्त मुद्देमाल: ४,५७,५५०/- रुपये.

कायदेशीर कारवाई व गुन्हा दाखल

सदर प्रकरणातील आरोपींविरुद्ध पोलीस हवालदार महेश कवठाळे (नं. १२८७) यांच्या फिर्यादीवरून भारतीय न्याय संहिता (BNS) चे कलम ३१०(४), ३१०(५) सह शस्त्र अधिनियम कलम ४, २५ अन्वये गुन्हा नोंदविण्यात आला आहे. या आंतरजिल्हा टोळीचे इतर गुन्ह्यांमध्ये काही सहभाग आहे का, याबाबतचा सखोल तपास सध्या सुरू आहे.

यशस्वी कारवाई करणारे पोलीस पथक

ही धडक कारवाई पोलीस अधीक्षक  पंकज कुमावत यांच्या आदेशानुसार व पोलीस निरीक्षक  गजेंद्र सरोदे यांच्या मार्गदर्शनाखाली खालील पथकाने पार पाडली:

• सहाय्यक पोलीस निरीक्षक:  रामेश्वर धोंडगे

• पोलीस अंमलदार:  महेश कवठाळे, राहुल परसोडे, सचिन भदर्गे, माणिक वाघ, सिद्धेश्वर चाटे, नामदेव दुबे, निलपत्रेवार, राम पौळ, माहुरे, महारुद्र सपकाळ आणि इमरान.