तरुणीची छेड काढून मारहाण; खडकी परिसरातील घटना; एकावर गुन्हा दाखल…
पुणे(प्रतिनिधी) – पेट्रोल भरण्यासाठी गेलेल्या तरुणीकडे पाहून अश्लील हावभाव केल्याचा जाब विचारण्यासाठी गेलेल्या तरुणीला आरोपीने पिडीत तरुणीला मारहाण केल्याची घटना बोपोडी येथील एका पेट्रोल पंपावर घडली आहे. याप्रकरणी खडकी पोलिसांनी एकावर गुन्हा दाखल केला आहे.
गौतम राजू कदम (पत्ता माहीत नाही) याच्यावर विनयभंग केल्याप्रकरणी गुन्हा दाखल केला. याप्रकरणी चिखलवाडी, बोपोडी येथे राहणाऱ्या २३ वर्षीय तरुणीने खडकी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी पीडित तरुणी १९ ऑक्टोबर रोजी सायंकाळी साडेपाचच्या सुमारास बोपोडी येथील पेट्रोल पंपावर गाडीत पेट्रोल टाकण्यासाठी गेली होती. त्यावेळी पंपावर रांग असल्याने ती रांगेत उभी होती. त्यावेळी आरोपी त्याठिकाणी आला. त्याने संबंधित मुलीकडे पाहून डोळा मारला. तसेच अश्लील हावभाव केले.
दरम्यान, याचा जाब तरुणीने आरोपीकडे विचारला असता, त्याने तरुणीला कानशिलात लगावत मारहाण केली. तसेच अश्लील कृत्य करून तिचा विनयभंग केल्याचे फिर्यादीत म्हटले आहे. या प्रकरणाचा पुढील तपास पोलिस उपनिरीक्षक गुंजाळ करीत आहेत.
