सोसायटीतील दुकानदाराकडून अवघ्या दहा वर्षांच्या चिमुरडीवर अत्याचार,गुन्हा दाखल…
पुणे(प्रतिनिधी) – मुलगी घरात, सोसायटीत कुठेही सुरक्षित नसल्याचे पुन्हा एकदा उघडकीस आले आहे. आता सोसायटीतील दुकानदाराने अवघ्या दहा वर्षांच्या मुलीशी अश्लील कृत्य केल्याची धक्कादायक घटना सिंहगड रस्ता परिसरात घडली आहे. या प्रकरणी दुकान मालकाविरुद्ध गुन्हा दाखल करण्यात आला आहे.
याबाबत मिळालेल्या अधिक माहितीनुसार,
शिवाजी महिपती कोंडेकर (वय ५५, रा. धायरी)
असे नराधम दुकान मालकाचे नाव आहे. याबाबत संबंधित मुलीच्या आईने सिंहगड रस्ता पोलीस ठाण्यात फिर्याद दाखल केली आहे.
याप्रकरणी पोलिसांनी दिलेल्या माहितीनुसार, शिवाजी कोंडेकर याचे सिंहगड रस्त्यावरील माणिकबाग परिसरात एका सोसायटीत दुकान आहे. तक्रारादार महिला याच सोसायटीत राहते. सोसायटीतील टेरेसची चावी घेण्यासाठी कोंडेकर फिर्यादी महिलेच्या घरी आला होता. त्यावेळी महिला आणि तिची दहा वर्षांची मुलगी घरातच होती. महिला चावी आणण्यासाठी गेली. त्यावेळी घरात मुलगी एकटीच होती. याच संधीचा फायदा उठवत कोंडेकर याने मुलीशी अश्लील कृत्य केले.
दरम्यान, आई परतल्यानंतर मुलीने याबाबतची माहिती आईला दिली. त्यानंतर आईने सिंहगड रस्ता पोलिस ठाण्यात फिर्याद दाखल केली. या घटनेचा अधिक तपास पोलिस उपनिरीक्षक साबळे करत आहेत.
