अमरावती: गाडगेनगर खून प्रकरणातील मुख्य आरोपी जेरबंद

अमरावती शहर हादरले! गाडगेनगर परिसरातील बहुचर्चित चैतन्य कचरे खून प्रकरणातील मुख्य आरोपी अखेर गुन्हे शाखेच्या जाळ्यात

अमरावती: अमरावती शहरात काही दिवसांपूर्वी घडलेल्या एका सनसनाटी खुनाच्या गुन्ह्यात शहर गुन्हे शाखेच्या पथकाने मोठी आणि धडाकेबाज कारवाई केली आहे. जुन्या वादातून चैतन्य उर्फ निक्कु कचरे या ३१ वर्षीय तरुणाची निर्घृण हत्या करणाऱ्या मुख्य आरोपीला गुन्हे शाखेने शिताफीने जेरबंद केले आहे. अश्विन उर्फ गुल्ल्या अशोक पाहडण (वय २६, रा. ग्राम मासोद, ता. जि. अमरावती) असे अटक करण्यात आलेल्या मुख्य आरोपीचे नाव आहे.

हत्येची नेमकी पार्श्वभूमी:

मृतक चैतन्य उर्फ निक्कु कचरे (रा. खरैया नगर, अमरावती) हा तरुण ३१ वर्षांचा होता. दिनांक ०८ नोव्हेंबर २०२६ रोजी जुन्या वादाच्या कारणातून आरोपींनी चैतन्यला महेंद्र कॉलनी येथील पांढरी हनुमान मंदिरामागील जंजाळ यांच्या रेतीच्या ठियावर बोलावून घेतले. तिथे त्याच्या मानेवर धारदार चाकुने वार करून त्याला जिवानिशी ठार मारण्यात आले. या प्रकरणी मृतकाचे वडील राजेंद्र तुळशीराम कचरे यांच्या तक्रारीवरून गाडगेनगर पोलीस ठाण्यात गुन्हा दाखल करण्यात आला होता.

पोलिसांची फिल्मी स्टाईल कारवाई आणि अटक:

गुन्हा घडल्यापासून या प्रकरणातील मुख्य आरोपी अश्विन पाहडण हा सतत फरार होता आणि पोलिसांच्या हाती लागत नव्हता. दरम्यान, ९ नोव्हेंबर २०२६ रोजी गुन्हे शाखेच्या पथकाला गुप्त बातमीदाराकडून सविस्तर माहिती मिळाली की, हा फरार आरोपी बडनेरा रेल्वे स्थानकावरून रेल्वेने अमरावतीबाहेर पळून जाण्याच्या तयारीत आहे.

या माहितीची खात्री पटताच गुन्हे शाखेने तातडीने दोन विशेष पथके तयार केली आणि बडनेरा रेल्वे स्टेशनचा संपूर्ण परिसर पिंजून काढला. रेल्वे स्टेशनच्या प्लॅटफॉर्मवरून आरोपी अश्विन यास अत्यंत शिताफीने आणि पळून जाण्याची कोणतीही संधी न देता ताब्यात घेण्यात आले. त्यानंतर त्याला पुढील कायदेशीर कारवाईसाठी गाडगेनगर पोलिसांच्या हवाले करण्यात आले आहे.

पोलीस प्रशासनाची उच्चस्तरीय कारवाई:

सदर धडाकेबाज कारवाई अमरावती शहर पोलीस आयुक्त राकेश ओला यांच्या मार्गदर्शनाखाली, पोलीस उपायुक्त (परिमंडळ ०१) यशवंत सोळंके, पोलीस उपायुक्त (परिमंडळ ०२) श्याम घुगे, पोलीस उपायुक्त मुख्यालय तथा गुन्हे प्रांजली सोनवणे आणि सहायक पोलीस आयुक्त (गुन्हे) निलेश ब्राम्हणे यांच्या सुचनांनुसार पार पडली.

या ऑपरेशनमध्ये गुन्हे शाखेचे पोलीस निरीक्षक अतुल वर आणि दिनेश दहातोंडे यांच्या नेतृत्वात सहायक पोलीस निरीक्षक दशरथ आडे, पोलीस उपनिरीक्षक गजानन सोनुने, राहुल महाजन, सचिन माकोडे तसेच गुन्हे शाखा व सायबर सेलच्या कुशल अंमलदारांनी सहभाग घेऊन हा तपास यशस्वी केला.