हिंगणघाटात गांजा व दारू तस्करांवर स्थानिक गुन्हे शाखेची धडक कारवाई; ८७ हजारांचा मुद्देमाल जप्त, दोन अटकेत तर मुख्य आरोपी फरार!

वर्धा जिल्हा पोलीस अधीक्षक श्री. सौरभ कुमार अग्रवाल यांनी जिल्ह्यातील अंमली पदार्थ व बेकायदेशीर दारू बाळगणाऱ्या व त्यांची विक्री करणाऱ्या गुन्हेगारांवर कडक कारवाई करण्याचे स्पष्ट आदेश स्थानिक गुन्हे शाखेस (LCB) दिले आहेत. या आदेशांनुसार स्थानिक गुन्हे शाखेने जिल्ह्यात अवैध धंद्यांविरुद्ध विशेष धडक मोहीम राबविण्यास सुरुवात केली आहे.

दरम्यान, दिनांक २९ ऑक्टोबर २०२६ रोजी स्थानिक गुन्हे शाखेच्या पथकाला गुप्त बातमीदाराकडून हिंगणघाट येथील गोमाजी वार्ड भागात गांजा व दारूचा बेकायदेशीर साठा असल्याची आणि तिथून विक्री सुरू असल्याची खात्रीशीर बातमी मिळाली. माहिती मिळताच पोलिसांनी तात्काळ सापळा रचून आरोपी हर्षल विनोद गिमेकर याच्या घरावर छापा टाकला.

दोन आरोपींना रंगेहात पकडले, मुख्य आरोपी फरार

पोलीस पथकाने घरावर रेड मारली असता, तेथे विनोद पांडुरंग गिमेकर (वय ५२ वर्षे, रा. गोमाजी वार्ड, हिंगणघाट) आणि त्याचा चुलत भाऊ सुरज भिमसिंग चौके (वय २९ वर्षे, मूळ रा. प्रियंका कॉलनी, शेगाव नाका, अमरावती; सध्या रा. गोमाजी वार्ड, हिंगणघाट) हे दोघे हजर मिळून आले. पोलिसांनी संशयित घरझडती घेतली असता, घरात बेकायदेशीर गांजाचा साठा, देशी दारूचा साठा आणि अंगझडतीत दोन मोबाईल जप्त करण्यात आले.

पोलीस चौकशीदरम्यान दोन्ही आरोपींनी सदर मुद्देमाल हा हर्षल गिमेकरसह त्यांचा तिघांचा सामायिक असल्याचे मान्य केले. हे तिघेही संगनमताने गांजा आणि दारूची बेकायदेशीर तस्करी करून विक्री करत असल्याचे तपासात उघड झाले. या कारवाईत १ किलो ११३ ग्रॅम गांजा, देशी दारूच्या २०० सीलबंद बाटल्या (शिशा) आणि २ मोबाईल फोन असा एकूण ८७,१५० रुपयांचा मुद्देमाल जप्त करण्यात आला आहे.

एन.डी.पी.एस. व दारूबंदी कायद्यान्वये गुन्हा दाखल

घटनास्थळी रीतसर जप्ती पंचनामा करून दोन्ही आरोपींना ताब्यात घेण्यात आले आहे. याप्रकरणी पो.स्टे. हिंगणघाट येथे तिन्ही आरोपींविरुद्ध अंमली पदार्थ विरोधी कायदा (NDPS Act) आणि महाराष्ट्र दारूबंदी कायद्यान्वये गंभीर गुन्ह्याची नोंद करण्यात आली आहे. यातील मुख्य पसार आरोपी हर्षल विनोद गिमेकर याचा पोलीस शोध घेत आहेत.

धडक कारवाई करणारे पोलीस पथक

सदरची यशस्वी कारवाई पोलीस अधीक्षक  सौरभ कुमार अग्रवाल व अपर पोलीस अधीक्षक  सदाशिव वाघमारे यांच्या थेट मार्गदर्शनाखाली स्थानिक गुन्हे शाखा, वर्धा चे पोलीस निरीक्षक  विनोद चौधरी, सहाय्यक पोलीस निरीक्षक आशिषसिंग ठाकुर, तसेच पोलीस अंमलदार अरविंद येनुरकर, रोशन निंबोळकर, सागर भोसले आणि रवि पुरोहित यांनी पार पाडली.