स्थानिक गुन्हे शाखेच्या पथकाची वरोरा येथे मोठी कारवाई: ५.१५ लाखांची अवैध विदेशी दारू जप्त

स्थानिक गुन्हे शाखेच्या पथकाची वरोरा येथे  मोठी कारवाई: मध्यप्रदेशातून होणारी अवैध विदेशी दारूची वाहतूक पकडली; ५.१५ लाखांचा माल जप्त

वरोरा: मध्यप्रदेशातून बेकायदेशीररित्या विदेशी दारूची वाहतूक करणाऱ्या एका टोळीवर स्थानिक गुन्हे शाखा (LCB) चंद्रपूरच्या पथकाने वरोरा पोलीस स्टेशनच्या हद्दीत धडक कारवाई केली आहे. या कारवाईत पोलिसांनी दारू, वाहतुकीसाठी वापरलेली कार आणि मोबाईलसह एकूण ५ लाख १५ हजार ८५८ रुपयांचा मुद्देमाल जप्त केला असून दोन आरोपींना अटक केली आहे, तर एक आरोपी सध्या फरार आहे.

गोपनीय माहितीच्या आधारे ‘नंदोरी टी-पॉईंट’वर छापा

मिळालेल्या माहितीनुसार, दि. ३० जून २०२६ रोजी स्थानिक गुन्हे शाखा, चंद्रपूरच्या उपविभाग वरोरा पथकाला एका गुप्त बातमीदाराकडून माहिती मिळाली की, वरोरा हद्दीतून अवैध दारूची मोठी वाहतूक होणार आहे. या माहितीच्या आधारे पथकाने मौजा नंदोरी टी-पॉईंट येथे सापळा रचला. संशयास्पद वाहनाची तपासणी केली असता, त्यात मोठ्या प्रमाणावर विदेशी दारूचा साठा आढळून आला.

जप्त करण्यात आलेला मुद्देमाल

पोलिसांनी केलेल्या या कारवाईत खालील मुद्देमाल जप्त करण्यात आला आहे:

• विदेशी दारू: एकूण २९ पेट्या (३५३ नग) ७५० मिलीच्या विदेशी दारूच्या बाटल्या (एकूण किंमत: १,८३,८५८ रुपये).

  
  

  

  
  

• वाहन: दारूची वाहतूक करण्यासाठी वापरलेली ‘Toyota Etios GD’ कार (क्रमांक: MH 01 BT 1087, किंमत: ३,००,००० रुपये).

• मोबाईल: आरोपींकडे असलेले ३ मोबाईल फोन (किंमत: ३०,००० रुपये).

  
  

  

  
  

• एकूण जप्त किंमत: ५,१५,८५८ रुपये.

आरोपींवर गुन्हे दाखल

या प्रकरणी पोलिसांनी दोन आरोपींना ताब्यात घेतले असून एकाचा शोध सुरू आहे:

१) नरेंद्र जितेंद्र भाट (वय ३१ वर्षे, रा. जलनगर, चंद्रपूर)

२) सौं. दामिनी नरेंद्र भाट (रा. जलनगर, चंद्रपूर)

३) सूर्या उर्फ सूरज परसंगे (रा. जलनगर, चंद्रपूर)

या सर्व आरोपींविरुद्ध वरोरा पोलीस स्टेशन येथे महाराष्ट्र दारूबंदी कायद्याच्या (म.दा.का.) कलम ६५ (ई)(अ) आणि ८३ अन्वये गुन्हा नोंद करण्यात आला आहे. ही यशस्वी कारवाई स्थानिक गुन्हे शाखा चंद्रपूरच्या उपविभाग वरोरा पथकाने केली असून पुढील तपास पोलीस करीत आहेत.