अकोल्यात ‘ऑपरेशन प्रहार’चा बडगा; अवैध पेट्रोल-डिझेल विक्री करणाऱ्या तिघांना अटक, ७ लाखांचा मुद्देमाल जप्त

अकोला, १० ऑक्टोबर २०२६: अकोला शहरात पेट्रोल आणि डिझेलची अवैध आणि विनापरवाना विक्री करणाऱ्या रॅकेटवर उपविभागीय पोलीस अधिकाऱ्यांच्या पथकाने धडक कारवाई केली आहे. ‘ऑपरेशन प्रहार’ अंतर्गत जुने शहर पोलीस स्टेशन हद्दीतील एका कोल्ड स्टोअरवर छापा टाकून पोलिसांनी तीन जणांना ताब्यात घेतले असून, त्यांच्याकडून ७ लाख ११ हजार रुपयांहून अधिकचा मुद्देमाल जप्त करण्यात आला आहे.

कारवाईची पार्श्वभूमी आणि धाड

अकोला शहरामध्ये काही जण इंधन साठवून त्याची अनधिकृतपणे विक्री करत असल्याच्या गुप्त तक्रारी प्राप्त झाल्या होत्या. या तक्रारींची गंभीर दखल घेत पोलीस अधीक्षक यांनी प्रभावी कारवाई करण्याचे आदेश दिले होते.

याच पार्श्वभूमीवर, उपविभागीय पोलीस अधिकारी श्री. सुदर्शन प्रकाश पाटील यांच्या मार्गदर्शनाखाली त्यांच्या पथकाने पातुर रोडवरील पाटनी कोल्ड स्टोअरवर अचानक छापा टाकला. या कारवाईत तिघे जण पेट्रोल आणि डिझेलचा अवैध साठा करून विक्री करत असल्याचे रंगेहात निष्पन्न झाले.

ताब्यात घेण्यात आलेले संशयित आरोपी

अवैध इंधन विक्रीप्रकरणी पोलिसांनी खालील तीन आरोपींना जागीच ताब्यात घेतले:

• मोहम्मद फैजान अब्दुल रज्जाक (रा. रियाज कॉलनी, अकोला)

• दानिशखान परवेज खान (रा. चांदखाँ प्लॉट, जुने शहर, अकोला)

  
  

  

  
  

• मोहम्मद समिर मोहम्मद हाशम (रा. हमजा प्लॉट, जुने शहर, अकोला)

जप्त करण्यात आलेला मुद्देमाल (किंमत अंदाजे ७,११,७०० रुपये)

पोलिसांनी घटनास्थळावरून इंधनासह वाहतुकीसाठी वापरले जाणारे वाहन आणि रोख रक्कम असा मोठा मुद्देमाल हस्तगत केला आहे:

• पेट्रोल: ५०० लिटर (किंमत अंदाजे रु. ५५,०००)

• डिझेल: २०० लिटर (किंमत अंदाजे रु. २०,०००)

• इथॅनॉल: १९० लिटर (किंमत अंदाजे रु. १५,२००)

• वाहन: महिंद्रा बोलेरो पिकअप (किंमत अंदाजे रु. ६,००,०००)

• रोख रक्कम: रु. २१,५००

पुढील कायदेशीर कारवाई

पोलिसांनी जप्त केलेल्या मुद्द्यामासह तिन्ही आरोपींना ताब्यात घेतले असून, जुने शहर पोलीस स्टेशनमध्ये त्यांच्याविरोधात जीवनावश्यक वस्तू अधिनियम (कलम ३, ७) सहकलम २८८ अन्वये गुन्हा दाखल करण्याची कायदेशीर प्रक्रिया सुरू आहे.

पोलीस पथकाची कामगिरी

सदर धडाकेबाज कारवाई पोलीस अधीक्षक  अर्चित चांडक, अपर पोलीस अधीक्षक  बी. चंद्रकांत रेड्डी आणि उपविभागीय पोलीस अधिकारी  सुदर्शन प्रकाश पाटील यांच्या मार्गदर्शनाखाली पोउपनि रत्नदीप पळसपगार, पोलीस अंमलदार रवींद्र घिवे, विनय जाधव, मोहम्मद नदीम, प्रफुल बांगर व गोपाल बायस्कर यांनी यशस्वीरीत्या पार पाडली.