यवतमाळ शहरात लूटमार करणारे दोन आरोपी 24 तासांत जेरबंद; चोरीचा 100 टक्के मुद्देमाल हस्तगत

यवतमाळ | प्रतिनिधी

यवतमाळ शहरातील पांढरकवडा रोड परिसरात शेतात काम करत असलेल्या एका शेतकऱ्यावर हल्ला करून सोन्याची अंगठी लुटणाऱ्या दोन आरोपींना स्थानिक गुन्हे शाखेच्या पथकाने अवघ्या 24 तासांत अटक केली आहे. या कारवाईत लुटलेली सोन्याची अंगठी तसेच चोरीस गेलेली पाण्याची मोटार असा एकूण 1 लाख 13 हजार 440 रुपयांचा मुद्देमाल जप्त करण्यात आला आहे.सदर कारवाई पोलीस अधीक्षक श्री. कुमार चिंथा, अपर पोलीस अधीक्षक श्री. अशोक थोरात तसेच स्थानिक गुन्हे शाखेचे पोलीस निरीक्षक श्री. सतीश चव्हरे यांच्या मार्गदर्शनाखाली पार पडली.

शेतकऱ्यावर हल्ला करून अंगठी लुटली

पोलिसांनी दिलेल्या माहितीनुसार, दिनांक 13 जून 2026 रोजी दुपारच्या सुमारास पांढरकवडा रोडवरील “चाचा का ढाबा” परिसरात राहणारे सुनील महादेव पाली (वय 55) हे आपल्या शेतात असताना दोन अज्ञात आरोपींनी त्यांच्यावर हल्ला केला. आरोपींनी धारदार शस्त्राने वार करून त्यांना जखमी केले आणि त्यांच्या हातातील सुमारे 7 ग्रॅम वजनाची सोन्याची अंगठी जबरदस्तीने हिसकावून पळ काढला.

या प्रकरणी यवतमाळ शहर पोलीस ठाण्यात गुन्हा क्रमांक 496/2026 अंतर्गत भारतीय न्याय संहिता (BNS) कलम 309(6) व 3(5) अन्वये गुन्हा दाखल करण्यात आला.

स्थानिक गुन्हे शाखेची तत्काळ कारवाई

घटनेचे गांभीर्य लक्षात घेऊन स्थानिक गुन्हे शाखेचे पोलीस निरीक्षक यांच्या मार्गदर्शनाखाली विशेष पथक तयार करण्यात आले. गोपनीय माहितीच्या आधारे पोलिसांनी दोन संशयितांना ताब्यात घेत चौकशी केली.

अटक करण्यात आलेल्या आरोपींची नावे :

• सतीश उर्फ शेंबड्या उर्फ मुंगश्या बाबाराव मडावी (वय 25), रा. दादाबादशाह नगर, राळेगाव (सध्या लोहरा, यवतमाळ)
• शेख समीर उर्फ छोट्या शेख इस्राईल (वय 22), रा. बेंडकिपुरा, यवतमाळ

चौकशीत दोघांनी लूटमारीची कबुली दिली.

आणखी एका चोरीचीही कबुली

पोलिस तपासादरम्यान आरोपींनी त्याच दिवशी पांढरकवडा रोड परिसरातील शेतातून 5 एचपी क्षमतेची पाण्याची मोटार चोरी केल्याची कबुलीही दिली.

यामुळे आरोपींविरुद्ध आणखी एका गुन्ह्याची नोंद करण्यात आली असून दोन्ही गुन्ह्यांतील चोरीचा संपूर्ण मुद्देमाल पोलिसांनी जप्त केला आहे.

जप्त मुद्देमाल

• 7 ग्रॅम वजनाची सोन्याची अंगठी – किंमत अंदाजे ₹1,07,440
• 5 एचपी पाण्याची मोटार – किंमत अंदाजे ₹6,000

एकूण जप्त मुद्देमाल : ₹1,13,440

सराईत गुन्हेगार असल्याची माहिती

पोलिसांच्या माहितीनुसार आरोपी सतीश उर्फ शेंबड्या उर्फ मुंगश्या मडावी हा सराईत गुन्हेगार असून यापूर्वीही त्याच्यावर प्रतिबंधात्मक कारवाई करण्यात आली होती.

वरिष्ठांच्या मार्गदर्शनाखाली यशस्वी कारवाई

ही कारवाई जिल्हा पोलीस अधीक्षक यांच्या मार्गदर्शनाखाली स्थानिक गुन्हे शाखेच्या अधिकारी व कर्मचाऱ्यांनी संयुक्तपणे केली. आरोपींना पुढील कारवाईसाठी यवतमाळ शहर पोलिसांच्या ताब्यात देण्यात आले असून पुढील तपास सुरू आहे.

यवतमाळ पोलिसांच्या या जलद कारवाईमुळे अवघ्या 24 तासांत लूटमारीचा गुन्हा उघडकीस आला असून चोरीचा 100 टक्के मुद्देमाल हस्तगत करण्यात यश आले आहे.

कारवाईत सहभागी अधिकारी व कर्मचारी

सदर कारवाई पोलीस अधीक्षक श्री. कुमार चिंथा, अपर पोलीस अधीक्षक श्री. अशोक थोरात तसेच स्थानिक गुन्हे शाखेचे पोलीस निरीक्षक श्री. सतीश चव्हरे यांच्या मार्गदर्शना व  यशस्वीरीत्या पार पडली. या कारवाईत सपोनि. मनीष गावंडे, पोउपनि. सागर इंगळे, पोलीस अंमलदार अजय डोळे, रुपेश पाली, प्रशांत हेडाऊ, ऋतुराज मेडवे, सुनील पैठणे, महेश वाकोडे, देवेंद्र होले, प्रतीक नेवरे, ऋषी फुलकर तसेच सायबर पोलीस स्टेशन यवतमाळचे अंमलदार अमित पसले यांनी सहभाग घेत यशस्वीरीत्या कारवाई पूर्ण केली.