अंगणवाडी साहित्य व ऑटो चोरणारा आरोपी तिवसा पोलिसांच्या गळाला!
तिवसा (अमरावती ग्रामीण): तिवसा पोलीस स्टेशनच्या हद्दीतून प्रवासी ऑटो रिक्षा, तसेच अंगणवाडी केंद्रातून घरगुती वापराचे सिलेंडर आणि किराणा सामान चोरणाऱ्या एका सराईत आरोपीला पोलिसांनी अटक केली आहे. त्याच्याकडून दोन वेगवेगळ्या गुन्ह्यांमधील एकूण ७४,५८० रुपये किमतीचा मुद्देमाल जप्त करण्यात आला आहे. या कारवाईत अमरावती ग्रामीणचे पोलीस अधीक्षक श्री. निकेतन कदम, अपर पोलीस अधीक्षक श्री. दत्ता तोटेवाड, आणि उपविभागीय पोलीस अधिकारी (दर्यापूर प्रभार, चांदूर रेल्वे) श्री. कुळकर्णी यांच्या मार्गदर्शनाखाली करण्यात आली.
तक्रार व गुन्हा: शिक्षक कॉलनी, तिवसा येथे राहणारे फिर्यादी बंडू नत्थुजी पाठक (वय ५० वर्ष, मूळ रा. ममदापूर) यांचा एक जुना तीनचाकी प्रवासी ऑटो (क्रमांक: MH-27-AR-1607, किंमत साधारण ७०,००० रुपये) तिवसा येथील जुन्या सरकारी दवाखान्यासमोरून चोरीला गेला होता. याप्रकरणी तिवसा पोलीस स्टेशनमध्ये अपराध क्रमांक ३००/२६, कलम ३०३ (२) B.N.S. अन्वये गुन्हा दाखल करण्यात आला होता.
कारवाई: गोपनीय माहितीच्या आधारे पोलिसांनी १३ जून २०२६ रोजी आरोपी रेवचंद्र नारायण डोंगरे (वय ३३ वर्ष, रा. ममदापूर, ता. तिवसा, जि. अमरावती) याला अटक केली. त्याच्या ताब्यातून चोरीला गेलेला ७०,००० रुपयांचा ऑटो पंचांसमक्ष जप्त करून हा गुन्हा उघडकीस आणला.
तक्रार व गुन्हा: ममदापूर येथील अंगणवाडी केंद्र क्रमांक ०९ मधून अज्ञात चोराने इंडेन कंपनीचे सिलेंडर, ८ सोयाबीन तेलाची पाकिटे, एक किलो हळद आणि एक किलो तिखट असा एकूण ५,४४० रुपयांचा मुद्देमाल चोरून नेला होता. याप्रकरणी १२ जून २०२६ रोजी अपराध क्रमांक २९९/२६, कलम ३०३ (२) B.N.S. अन्वये गुन्हा नोंदवण्यात आला होता.
कारवाई: या गुन्ह्याचा समांतर तपास करत असताना, १४ जून २०२६ रोजी पोलिसांनी आरोपी रेवचंद्र नारायण डोंगरे याच्या घराची झडती घेतली. त्याच्या घरातून चोरीला गेलेले इंडेन कंपनीचे सिलेंडर (किंमत ३,२), आणि १,३८० रुपयांचे किराणा सामान, असा एकूण ४,५८० रुपयांचा मुद्देमाल पंचांसमक्ष जप्त करण्यात आला. आरोपीवर पुढील कायदेशीर कारवाई सुरू आहे.
