गोंदियात स्थानिक गुन्हे शाखेची मोठी कारवाई: ८.३१ किलो गांजासह ९.४२ लाखांचा मुद्देमाल जप्त!
गोंदिया: जिल्ह्यामध्ये अवैध धंद्यांवर प्रभावी कारवाई करण्याचे निर्देश गोंदियाचे पोलीस अधीक्षक श्री. गोरख भामरे आणि अपर पोलीस अधीक्षक श्री. अभय डोंगरे यांनी दिले होते. या निर्देशांनुसार, स्थानिक गुन्हे शाखेच्या पथकाने आमगाव पोलीस स्टेशनच्या हद्दीत धडक कारवाई करत अवैध गांजा वाहतूक करणाऱ्या एका आरोपीला रंगेहात अटक केली आहे.
स्थानिक गुन्हे शाखा, गोंदियाचे पोलीस निरीक्षक रेवचंद सिंगनजुडे यांच्या मार्गदर्शनाखाली पोलीस पथक १२ ऑगस्ट २०२६ रोजी आमगाव पोलीस ठाण्याच्या हद्दीत गस्त घालताना त्यांना गुप्त बातमीदाराकडून खात्रीशीर माहिती मिळाली.
-
माहिती काय होती?
-
प्रमोद जितेंद्र लक्षणे (वय २६ वर्ष, रा. झिलमिली, ता. जि. गोंदिया) हा इसम कुंभार्टोली (आमगाव) ते जामखारी रोडने अवैधपणे गांजा बाळगून त्याची विक्री करण्यासाठी वाहतूक करणार आहे.
पोलीस पथकाचा सापळा: माहिती मिळताच पोलिसांनी कुंभार्टोली ते जामखारी जाणाऱ्या रोडवर गुप्तपणे सापळा रचला. काही वेळातच एक इसम पाठीवर एक स्कूल बॅग आणि पांढऱ्या रंगाच्या ‘सुझुकी बर्गमन’ मोपेड दुचाकीच्या समोर दुसरी स्कूल बॅग ठेवून जामखारीकडून कुंभार्टोलीकडे येताना दिसला.
झाडाझडती व जप्ती: संशयिताला रोखून पंचांसमक्ष त्याची व बॅगची पाहणी केली असता, दोन्ही बॅग्समध्ये हिरवा ओलसर पाला, फुले व बिया मिश्रित गांजा आढळून आला.
-
गांजा: ०८.३१० किलो (किंमत ₹८,३१,०००/-)
स्कूल बॅग्स: २ नग (किंमत ₹१,०००/-)
मोबाईल: १ अँड्रॉइड मोबाईल (किंमत ₹१०,०००/-)
वाहून नेणारे वाहन: पांढऱ्या रंगाची सुझुकी बर्गमन मोपेड दुचाकी (किंमत ₹१,००,०००/-)
या प्रकरणी आरोपी प्रमोद जितेंद्र लक्षणे (वय २६ वर्षे, रा. झिलमिली, जि. गोंदिया) याच्याविरुद्ध पोलीस स्टेशन आमगाव येथे एन.डी.पी.एस. कायद्यान्वये गुन्हा नोंदवण्यात आला आहे.
ही धडक कारवाई स्थानिक गुन्हे शाखेचे सपोनि अमरदीप खाडे, पो.हवा. संजय चव्हाण, विठ्ठलप्रसाद ठाकरे, दीक्षितकुमार दमाहे, सुबोधकुमार बिसेन, इंद्रजित बिसेन, सोमेंद्रसिंग तुरकर, पो.शि. छगन विठ्ठले, हंसराज भंडारकर, राम खंडारे तसेच सायबर सेलचे सपोनि देविदास ठमके, प्रमोद सोनवाने, योगेश रहीले आणि अश्विन वंजारी यांच्या पथकाने यशस्वीरीत्या पार पाडली.
