चंद्रपुरात पोलिसांची धडक कारवाई: ६ लाखांचे नाही, तर २० हजारांचे एम.डी. ड्रग्स जप्त; नागपूर कनेक्शन उघड!

चंद्रपूर:

युवा पिढीला अमली पदार्थांच्या विळख्यातून बाहेर काढण्यासाठी आणि अवैध धंद्यांवर वचक निर्माण करण्यासाठी चंद्रपूर पोलिसांनी आक्रमक पवित्रा घेतला आहे. दरम्यान, स्थानिक गुन्हे शाखेच्या (LCB) पथकाने चंद्रपूर शहरात अत्यंत चलाखीने सापळा रचून मेफेड्रोन (एम.डी.) ड्रग पावडरची तस्करी करणाऱ्या एका तस्कराला रंगेहात जेरबंद केले आहे. या कारवाईमुळे शहरात ड्रग्स विक्रेत्यांचे धाबे दणाणले आहेत.

अशी झाली कारवाई: पोलिसांची फिल्मी स्टाईल सापळा रचना

दिनांक २१ ऑक्टोबर २०२६ रोजी स्थानिक गुन्हे शाखेचे पथक चंद्रपूर शहरात गस्तीवर असताना पोलिसांना एक अत्यंत खात्रीशीर गुप्त माहिती मिळाली. रामाळा तलाव परिसरातील एक इसम एम.डी. ड्रग्सची विक्री करण्यासाठी जमनजेट्ठी परिसरात येणार असल्याची कुणकुण पोलिसांना लागली.

माहिती मिळताच पोलिसांच्या पथकाने क्षणाचाही विलंब न लावता हनुमान मंदिरासमोर आणि एम.ई.सी.बी. ऑफिस जवळील जमनजेट्ठी परिसरात रणनीती आखत सापळा रचला. वर्णनानुसार पांढऱ्या रंगाचा, त्यावर तपकिरी टिप्के असलेला फुल बाह्यांचा शर्ट आणि काळी पँट घातलेला एक संशयित इसम तेथे पोहोचताच, सतर्क पोलिसांनी त्याला चोहोबाजूंनी घेत जेरबंद केले.

तस्कराची ओळख

पोलिसांनी ताब्यात घेतलेल्या आरोपीची कसून चौकशी केली असता त्याची माहिती समोर आली:-

• नाव: शानवाज उर्फ शानू इस्माईल शेख

  
  

  

  
  

• वय: २८ वर्षे

• रा. अहमदीया मस्जिद जवळ, रामाळा तलाव, चंद्रपूर

  
  

  

  
  

अंगझडतीत काय सापडले? (मुद्देमालाचा तपशील)

एन.डी.पी.एस. (NDPS) कायद्याच्या कठोर नियमांचे पालन करत राजपत्रित अधिकारी, पंच आणि अधिकृत वजन-मापाऱ्यांसमक्ष आरोपीची अंगझडती घेण्यात आली. त्याच्या पँतीच्या खिशातून एक प्लास्टिक पिशवीत पांढऱ्या रंगाची एम.डी. ड्रग पावडर मिळून आली. घटनास्थळीच अमली पदार्थ टेस्टिंग किटद्वारे तपासणी केली असता ती पावडर अमली पदार्थ असल्याचे सिद्ध झाले.

पोलिसांनी तस्कराकडून एकूण ४२,३१० रुपयांचा मुद्देमाल जप्त केला आहे, ज्यामध्ये खालील गोष्टींचा समावेश आहे:

• एम.डी. ड्रग पावडर: ६.१३० ग्रॅम (पर्णीसह) – किंमत २०,१९०/- रुपये

  मोबाईल फोन: ओपो ए-५ प्रो कंपनीचा जुना वापरता मोबाईल – किंमत २०,०००/- रुपये

  रोख रक्कम: २,१२०/- रुपये

  मुख्य धागेदोरे: नागपूर कनेक्शन उघड!

पोलिसांच्या प्राथमिक तपासात आरोपीने अत्यंत खळबळजनक कबुली दिली आहे. त्याने ही ड्रग पावडर विक्रीसाठी थेट नागपूर येथून आणल्याचे निष्पन्न झाले आहे. याप्रकरणी चंद्रपूर शहर पोलीस ठाण्यात अमली पदार्थ व मनोव्यापारावर परिणाम करणारे पदार्थ अधिनियम १९८५ (NDPS Act) चे कलम ८ (क), २२ (ब) अन्वये गुन्हा दाखल करण्यात आला आहे. नागपूरहून हा माल चंद्रपुरात कोणाकडे आणला जात होता आणि या तस्करीचे मोठे जाळे कुठे-कुठे पसरले आहे, याचा सखोल तपास आता पोलीस करत आहेत.

पोलीस प्रशासनाची यशस्वी कामगिरी

ही धडक कारवाई चंद्रपूरचे पोलिस अधीक्षक आयुष्य नोपाणी आणि अपर पोलिस अधीक्षक  ईश्वर कातकडे यांच्या मार्गदर्शनाखाली पार पडली. स्थानिक गुन्हे शाखेचे पोलिस निरीक्षक अमोल काचारे यांच्या नेतृत्वाखाली सहाय्यक पोलीस निरीक्षक योगेश हिवसे, पोलीस उपनिरीक्षक बलराम झाडोकर, विनोद भुरले, सुनील गौरकार तसेच LCB आणि सायबर पोलीस स्टेशनच्या पथकातील अंमलदारांनी ही कामगिरी फत्ते केली आहे.