३ वर्षांपासून पोलिसांना चकवा देणारा सराईत गुन्हेगार परभणीतून जेरबंद; वर्धा LCB ची धडक कारवाई

वर्धा / पुलगाव:पोलीस स्टेशन पुलगाव अंतर्गत दाखल असलेल्या घरफोडी व चोरीच्या गंभीर गुन्ह्यात तब्बल तीन वर्षांपासून फरार असलेल्या एका पसार आरोपीला वर्धा स्थानिक गुन्हे शाखेच्या (LCB) पथकाने परभणी शहरातून शिताफीने अटक केली आहे. चरणसिंग उर्फ रोशनसिंग बादलसिंग जुनी (वय ४८ वर्षे, रा. साफला प्लॉट, परभणी) असे बेड्या ठोकण्यात आलेल्या पसार आरोपीचे नाव आहे. या धडक कारवाईमुळे वर्धा पोलिसांच्या समांतर तपासाचे यश पुन्हा एकदा अधोरेखित झाले आहे.

काय आहे प्रकरणाची पार्श्वभूमी?

पुलगाव पोलीस ठाण्यात सन २०२३ मध्ये अपराध क्रमांक ७४१/२०२३ अन्वये भारतीय दंड संहितेच्या  गुन्हा दाखल करण्यात आला होता. या गुन्ह्याची नोंद झाल्यापासूनच मुख्य आरोपी चरणसिंग जुनी हा पोलिसांना गुंगारा देऊन भूमिगत झाला होता. गेल्या तीन वर्षांपासून तो पोलिसांच्या हाती लागला नव्हता आणि सतत ठिकाणे बदलत होता.

तांत्रिक व गोपनीय माहितीच्या आधारे समांतर तपास

गुन्ह्याचे गांभीर्य लक्षात घेऊन वर्धा स्थानिक गुन्हे शाखेच्या पथकाने या प्रकरणाचा समांतर तपास सुरू केला. सुरुवातीला या गुन्ह्यात आरोपीचा नेमका पत्ता किंवा हालचालींचा कोणताही सुगावा पोलिसांकडे नव्हता. मात्र, स्थानिक गुन्हे शाखेच्या अधिकारी व अंमलदारांनी गुप्त बातमीदार आणि तांत्रिक विश्लेषğाच्या आधारे कसून माहिती गोळा करण्यास सुरुवात केली.

तपासादरम्यान एलसीबीच्या पथकाला अत्यंत गोपनीय माहिती मिळाली की, मागील तीन वर्षांपासून पसार असलेला आरोपी चरणसिंग जुनी हा परभणी शहरातील आपल्या मूळ भागात म्हणजेच ‘साफला प्लॉट’ परिसरात लपूनछपून आला असून सध्या तो त्याच परिसरात उपस्थित आहे.

परभणीत सापळा रचून आवळल्या मुसक्या

माहिती मिळताच क्षणाचाही विलंब न लावता स्थानिक गुन्हे शाखेचे विशेष पथक तातडीने परभणीकडे रवाना झाले. पथकाने परभणी शहरातील साफला प्लॉट परिसरात सापळा रचून आरोपीचा कसून शोध घेतला. यादरम्यान पाहिजे असलेला आरोपी चरणसिंग उर्फ रोशनसिंग जुनी हा पोलिसांच्या जाळ्यात अडकला. पोलिसांनी त्यास तात्काळ ताब्यात घेतले.

कायदेशीर नियमांचे पालन करत आरोपीला ताब्यात घेतल्याची माहिती तत्काळ त्याच्या नातेवाईकांना (पत्नीला) देण्यात आली. त्यानंतर पुढील कायदेशीर प्रक्रिया आणि चौकशीसाठी आरोपीस पुलगाव पोलिसांच्या ताब्यात देण्यात आले असून, या प्रकरणी पुलगाव पोलीस पुढील तपास करत आहेत.

कुणाच्या मार्गदर्शनाखाली पार पडली कारवाई?

ही यशस्वी कारवाई वर्धा जिल्ह्याचे पोलीस अधीक्षक  सौरभकुमार अग्रवाल, अप्पर पोलीस अधीक्षक  सदाशिव वाघमारे आणि स्थानिक गुन्हे शाखेचे पोलीस निरीक्षक विनोद चौधरी यांच्या मार्गदर्शनाखाली पार पडली.

तपास पथकात स्थानिक गुन्हे शाखा, वर्धाचे पोलीस उपनिरीक्षक राहुल इटेकर, पोलीस अंमलदार मनोज धात्रक, महादेव सानप, हर्षल सोनटक्के, अभिषेक नाईक, रितेश गेटमे तसेच सायबर सेल, वर्धा येथील मिना कौरती यांनी सहभाग घेऊन ही कारवाई यशस्वी केली.