हिंगणघाट: अवैध रेती वाहतूक करणारा ट्रॅक्टर जप्त; ५ लाखांचा मुद्देमाल हस्तगत

हिंगणघाट येथे पोलिसांची मोठी कारवाई; रेतीची अवैध वाहतूक करणारा विना क्रमांकाचा ट्रॅक्टर जप्त, ५ लाखांचा माल हस्तगत!

हिंगणघाट: शासनाचा कोणताही परवाना नसताना विनाक्रमांकाच्या ट्रॅक्टर व ट्रॉलीमधून अवैध रेतीची (वाळूची) वाहतूक करणाऱ्या एका आरोपीला हिंगणघाट पोलिसांनी रंगेहात पकडले. दिनांक २९ जून २०२६ रोजी कलोडे चौक परिसरात ही कारवाई करण्यात आली असून, या कारवाईत ट्रॅक्टर, ट्रॉली आणि रेतीसह एकूण ५,०५,००० रुपयांचा माल जप्त करण्यात आला आहे.सदर यशस्वी कारवाई वर्धा जिल्ह्याचे पोलीस अधीक्षक सौरभकुमार अग्रवाल, अप्पर पोलीस अधीक्षक सदाशिव वाघमारे, उपविभागीय पोलीस अधिकारी सुशिलकुमार नायक आणि हिंगणघाटचे पोलीस निरीक्षक अनिल राऊत यांच्या मार्गदर्शनाखाली करण्यात आली.

खबरीच्या माहितीवरून सापळा

हिंगणघाट पोलीस स्टेशनचे डी.बी. पथक (गुन्हे शोध पथक) पोलीस निरीक्षकांच्या आदेशानुसार परिसरात पेट्रोलींग करत होते. दरम्यान, नांदगाव चौकाकडून कलोडे चौकाकडे एक विना क्रमांकाचा लाल रंगाचा ट्रॅक्टर बेकायदेशीरपणे काळ्या रेतीची चोरी करून वाहतूक करणार असल्याची पक्की माहिती खबरीकडून मिळाली. माहिती मिळताच डी.बी. पथकाने शासकीय वाहनाचा वापर न करता खाजगी वाहनाने कलोडे चौकात जाऊन नाकाबंदी केली.

आरोपीला घेतले ताब्यात

नाकाबंदी दरम्यान खबरीने सांगितल्याप्रमाणे एक विना क्रमांकाचा लाल ट्रॅक्टर येताना दिसला. पोलिसांनी ट्रॅक्टर थांबवून चालकाची चौकशी केली असता त्याने आपले नाव देवदत्त विठ्ठलराव वरखेडे (वय ४३ वर्ष, रा. मास्टर कॉलनी, हिंगणघाट, जि. वर्धा) असे सांगितले.

५ लाखांपेक्षा जास्त मुद्देमाल जप्त

पोलिसांनी पंचांसमक्ष ट्रॅक्टर व ट्रॉलीची पाहणी केली असता खालील मुद्देमाल आढळून आला आणि तो जप्त करण्यात आला:

• महिंद्रा सरपंच ट्रॅक्टर: लाल रंगाचा, विना आरटीओ नोंदणी क्रमांक (किंमत अंदाजे ४,००,००० रुपये)

• ट्रॉली: विना क्रमांकाची (किंमत अंदाजे १,००,००० रुपये)

  
  

  

  
  

• गौण खनिज (ओली रेती): ट्रॉलीमध्ये भरलेली १ ब्रास म्हणजेच १०० फूट काळी रेती (किंमत अंदाजे ५,००० रुपये)

• एकूण जप्त मुद्देमाल: ५,०५,००० रुपये.

  
  

  

  
  

वाहतुकीचा कोणताही परवाना किंवा पास नसल्याने पोलिसांनी जप्ती पंचनामा करून आरोपीला ताब्यात घेतले आणि पोलीस स्टेशनला आणून कायदेशीर गुन्हा दाखल केला.

या पथकाने केली कारवाई

हिंगणघाट पोलीस स्टेशनच्या डी.बी. पथकातील पोलीस हवालदार प्रशांत ठोंबरे, पोलीस नाईक राजेश शेंडे, पोलीस शिपाई आशिष नेवारे, रोहित साठे आणि मंगेश वाघमारे यांनी केली.

सदर गुन्ह्याचा पुढील कायदेशीर तपास हिंगणघाट पोलीस करत आहेत.