समुद्रपूर पोलीस ठाणे बनले रेती माफियांचा कर्दनकाळ; ७ लाखांच्या मुद्देमालासह ट्रॅक्टर जप्त, ठाणेदार दीपक वानखडे यांच्या धडक कारवाईने खळबळ

समुद्रपूर (प्रतिनिधी): समुद्रपूर पोलीस स्टेशनचे ठाणेदार स.पो.नी. दीपक वानखडे यांनी पदभार स्वीकारल्यापासूनच परिसरातील अवैध धंदे करणाऱ्या माफियांविरुद्ध जोरदार मोहीम उघडली आहे. त्यांच्या या धडक कारवाईमुळे परिसरातील रेती माफियांचे धाबे दणाणले असून त्यांना ‘सळो की पळो’ करून सोडले आहे. याच मोहिमेचा भाग म्हणून ७ जुलै २०२६ रोजी समुद्रपूर पोलिसांनी एका मोठ्या रेती चोरीचा पर्दाफाश केला आहे. सदरची धडक कामगिरी वर्धा जिल्ह्याचे पोलीस अधीक्षक सौरभकुमार अग्रवाल, अप्पर पोलीस अधीक्षक सदाशिव वाघमारे आणि हिंगणघाटचे उपविभागीय पोलीस अधिकारी सुशीलकुमार नायर यांच्या आदेशानुसार व मार्गदर्शनात करण्यात आली.

गोपनीय माहितीच्या आधारे नाकेबंदी

मिळालेल्या माहितीनुसार, ७ जुलै रोजी समुद्रपूर पोलीस ठाण्याचे पथक परिसरात पेट्रोलिंग (गस्त) घालत होते. यादरम्यान पोलिसांना एका अत्यंत गोपनीय सूत्राकडून माहिती मिळाली की, समुद्रपूर शहराच्या दिशेने एका ट्रॅक्टरमध्ये अवैध आणि चोरीची रेती वाहतूक करून आणली जात आहे. माहिती मिळताच वेळेचा विलंब न लावता, ठाणेदार वानखडे यांच्या मार्गदर्शनात पोलीस पथकाने समुद्रपूर परिसरात तातडीने नाकेबंदी केली.

१ ब्रास काळी रेती आणि ट्रॅक्टर जप्त

नाकेबंदी दरम्यान संशयास्पद वाटणारा एक ट्रॅक्टर पोलिसांनी थांबवला. ट्रॅक्टरची कसून पाहणी केली असता, त्यामध्ये तब्बल १ ब्रास काळी रेती आढळून आली. या रेतीबाबत चालकाकडे कोणत्याही प्रकारचा अधिकृत परवाना किंवा रॉयल्टीची पावती नव्हती. ही रेती चोरीची असल्याचे निष्पन्न झाल्यानंतर पोलिसांनी ट्रॅक्टर चालक रोशन रामदासजी भुते (वय ३१ वर्षे, राहणार मांडगाव) याला ताब्यात घेतले.

पोलिसांनी घटनास्थळावरून ट्रॅक्टर आणि १ ब्रास काळी रेती असा एकूण ७ लाख ७ हजार रुपयांचा मुद्देमाल जप्त केला असून आरोपीविरुद्ध गुन्हा दाखल केला आहे.

वरिष्ठ अधिकाऱ्यांच्या मार्गदर्शनात कारवाई

कारवाई करणाऱ्या पथकात समुद्रपूरचे ठाणेदार स.पो.नी. दीपक वानखडे यांच्या नेतृत्वात पथक प्रमुख पोलीस हवालदार प्रमोद थुल, राहुल साठे, पोलीस शिपाई रवी धनवे, विजय काळे, सुमित भुते आणि अक्षय घणगावकर यांनी महत्त्वाची भूमिका बजावली. या प्रकरणाचा पुढील तपास समुद्रपूर पोलीस करत आहेत.

पोलीस प्रशासनाचा इशारा: समुद्रपूर पोलीस ठाण्याच्या हद्दीत कोणत्याही प्रकारचा अवैध रेती उपसा, साठा किंवा वाहतूक करताना आढळल्यास गय केली जाणार नाही. अवैध धंदे करणाऱ्यांवर यापुढेही अशीच कडक आणि कायदेशीर कारवाई सुरू राहील, असा कडक इशारा पोलीस प्रशासनाने दिला आहे.