वर्धा घरफोडी प्रकरण: १.८० लाखांच्या मुद्देमालासह आरोपीला अटक

वर्धा स्थानिक गुन्हे शाखेची कारवाई: पो. स्टे. रामनगर हद्दीत घरफोडी करणारा आरोपी ताब्यात; १.८० लाखांचा मुद्देमाल जप्त

वर्धा शहरातील रामनगर पोलीस स्टेशनच्या हद्दीत झालेल्या घरफोडीचा छडा लावत स्थानिक गुन्हे शाखेने (LCB) एका आरोपीला ताब्यात घेतले आहे. या कारवाईत चोरीला गेलेला सोन्याचा मुद्देमाल आणि सोनाराकडून जप्त करण्यात आलेला माल असा एकूण १,८०,४४१ रुपये किमतीचा मुद्देमाल हस्तगत करण्यात आला आहे.

घटना व तक्रार विक्रमशीला नगर, वर्धा येथील रहिवासी सौ. प्रज्ञा नितीन डांगरे या ७ ऑगस्ट २०२६ रोजी बाहेरगावी गेल्या होत्या. ८ ऑगस्ट रोजी सायंकाळी घरी परत आल्यावर त्यांना समोरील दरवाजाचे कुलूप तुटलेले दिसले. घरात पाहणी केली असता, बेडरूममध्ये गादीखाली ठेवलेली सोन्याची चेन, अंगठी, मंगळसूत्र व सोन्याचे मणी असलेली पर्स चोरीला गेल्याचे उघडकीस आले. या तक्रारीवरून रामनगर पोलीस ठाण्यात अज्ञात आरोपीविरुद्ध गुन्हा दाखल करण्यात आला होता.

तपास आणि कारवाई स्थानिक गुन्हे शाखेचे पथक वर्धा शहरात गस्त घालत असताना, गुप्तहेराकडून मिळालेल्या माहितीनुसार आकाश रमेश देवतळे (वय ३४ वर्ष, रा. तारफैल, वर्धा) याला रेल्वे स्टेशन परिसरातून ताब्यात घेण्यात आले. कसून चौकशी केली असता, त्याने गुन्ह्याची कबुली दिली.

चोरीचे सोने खरेदी करणारा सोनार निष्पन्न आरोपीने चोरी केलेले दागिने सेलू येथील स्वप्निल सुरेशराव गजपुरे या सोनार दुकानदाराला विकल्याचे सांगितले. पोलिसांनी सोनाराची चौकशी केली असता, त्याने दागिने विकत घेतल्याचे मान्य केले व चोरीचा मुद्देमाल पोलिसांच्या स्वाधीन केला.

जप्त मुद्देमाल

• १०.८०० ग्राम सोन्याची लगड (किंमत ₹१,५८,४३६/-)

• १.५ ग्राम सोन्याचे मणी (किंमत ₹२२,००५/-)

  
  

  

  
  

• एकूण जप्त किंमत: ₹१,८०,४४१/-

सदर आरोपी आणि जप्त मुद्देमाल पुढील कायदेशीर कारवाईसाठी रामनगर पोलिसांच्या ताब्यात देण्यात आला आहे. ही यशस्वी कारवाई पोलीस अधीक्षक  सौरभ कुमार अग्रवाल आणि अपर पोलीस अधीक्षक  सदाशिव वाघमारे यांच्या मार्गदर्शनाखाली पोलीस निरीक्षक विनोद चौधरी व स्थानिक गुन्हे शाखेच्या पथकाने केली.