बडनेरा पोलिसांची कारवाई: तडीपार केलेले दोन आरोपी अनधिकृतपणे आढळले, गुन्हे दाखल

अमरावती पोलिसांची धडक कारवाई: शहर व ग्रामीण भागातून हद्दपार केलेले दोन कुख्यात तडीपार आरोपी बडनेऱ्यात बिनदिक्कत फिरताना जेरेबंद; पोलीस ठाण्यात गुन्हे दाखल

 बडनेरा:

अमरावती शहर आणि ग्रामीण भागातून कायदा व सुव्यवस्थेचा प्रश्न निर्माण करणाऱ्या गुन्हेगारांवर अंकुश ठेवण्यासाठी पोलीस प्रशासनाने तडीपारीची कठोर मोहीम हाती घेतली आहे. असे असतानाही, पोलीस आयुक्तांच्या आदेशाला न जुमानता शहरातून तडीपार केलेले दोन आरोपी कोणतीही कायदेशीर परवानगी किंवा पास न घेता थेट अमरावती शहराच्या हद्दीत वावरत असल्याचा प्रकार उघडकीस आला आहे. बडनेरा पोलिसांनी गुप्त माहितीच्या आधारे केलेल्या धडक कारवाईत या दोन्ही तडीपार आरोपींना ताब्यात घेण्यात आले असून, त्यांच्यावर कायद्याचा बडगा उगारण्यात आला आहे.

तडीपार आरोपींची सविस्तर पार्श्वभूमी व आदेश:

१. जावेद बेग जमील बेग (वय ३४ वर्षे, रा. ताज नगर, दाभा पावती, बडनेरा):

या आरोपीच्या वाढत्या गुन्हेगारी कारवायांमुळे त्याला अमरावती शहर व ग्रामीण भागातून तडीपार करण्यात आले होते. अमरावती शहरचे मानद पोलीस उपायुक्त परिमंडळ-०१ यांच्या कार्यालयाकडून जारी करण्यात आलेल्या आदेशाक्रमानुसार  त्याला तब्बल १८ महिन्यांसाठी तडीपार करण्यात आले होते. मात्र, आदेशाची मुदत संपलेली नसतानाही हा आरोपी शहरात येऊन लपूनछपून राहत होता.

२. अप्पु उर्फ अफरोज खान मन्नान खान (वय ३२ वर्षे, रा. गवळीपुरा, बडनेरा):

या दुसऱ्या तडीपार आरोपीवरही गंभीर स्वरूपाचे गुन्हे दाखल असून, त्याला सुरक्षेच्या कारणास्तव अमरावती शहर आणि ग्रामीण क्षेत्रातून हद्दपार करण्यात आले होते. पोलीस उपायुक्त परिमंडळ-०१ अमरावती शहर यांच्या आदेशक्रमानुसार त्याला २ वर्षांच्या कालावधीसाठी तडीपार करण्यात आले होते. हा आरोपीही प्रशासनाची परवानगी न घेता शहरात पुन्हा सक्रिय झाल्याचे दिसून आले.

गुन्हे दाखल आणि कायदेशीर कारवाई:

दि १२ नोव्हेंबर २०२६ रोजी बडनेरा पोलीस ठाण्याच्या पथकाला मिळालेल्या खात्रीशीर गुप्त माहितीच्या आधारे, पंचांसमक्ष प्रत्यक्षात जाऊन पाहणी व तपासणी केली असता हे दोन्ही तडीपार इसम कोणतीही सक्षम प्राधिकाऱ्याची वा न्यायालयाची परवानगी न घेता अमरावती शहराच्या हद्दीत विनापरवाना फिरताना व वावरताना आढळले.

पोलीस आयुक्तांच्या आदेशाचे व तडीपारीच्या नियमांचे थेट उल्लंघन केल्याप्रकरणी बडनेरा पोलीस ठाण्यात दोन्ही आरोपींविरुद्ध कायदेशीर कारवाई करण्यात आली आहे. त्यांच्यावर अनुक्रमे महाराष्ट्र पोलीस कायद्यानुसार (म.पो.काँ.) स्वतंत्र गुन्हे नोंदवून पुढील कायदेशीर तपास सुरू करण्यात आला आहे.

पोलीस प्रशासनाचे मार्गदर्शन व यशस्वी पथक:

सदरची अत्यंत महत्त्वाची व धडक कारवाई खालील वरिष्ठ अधिकाऱ्यांच्या मार्गदर्शनाखाली पार पडली:

• मार्गदर्शन: पोलीस आयुक्त अमरावती शहर  राकेश ओला,  पोलीस उपायुक्त (परि-०१)  यशवंत सोळंके तसेच सहाय्यक पोलीस आयुक्त (फेजरपुरा विभाग) श्रीमती नयन अलुरकर.

• कारवाई करणारी टीम:  पोलीस स्टेशन बडनेराचे पोलीस निरीक्षक पुनित कुलट, पोलीस उपनिरीक्षक अनिस सावरकर तसेच डी.बी. (क्राईम ब्रँच) पथकाचे अंमलदार- पोलीस हेडकॉन्स्टेबल कैलाश जाधव, सागर सरदार, इजाज शहा, पोलीस कॉन्स्टेबल अतुल तायडे आणि वाहन चालक राजेश वाल्मीक.

या कारवाईमुळे अमरावती शहरातील गुन्हेगारी वर्तुळात आणि नियम मोडणाऱ्या घटकांमध्ये मोठी खळबळ उडाली आहे.