अमरावती ग्रामीण: स्थानिक गुन्हे शाखेची मोठी कारवाई; नेरपिंगळाई येथे सुरू असलेला ऑनलाईन जुगाराचा अड्डा उद्ध्वस्त

अमरावती (दि. १८ ऑक्टोबर २०२६):

अमरावती ग्रामीण जिल्ह्यात सुरू असलेल्या अवैध धंद्यांवर वचक निर्माण करण्यासाठी पोलीस प्रशासनाने कंबर कसली आहे. अमरावती ग्रामीणचे पोलीस अधीक्षक श्री. निकेतन कदम यांनी सुरू केलेल्या ‘ऑपरेशन कवच’ अंतर्गत मिळालेल्या गुप्त माहितीच्या आधारे, स्थानिक गुन्हे शाखेच्या पथकाने मोर्शी तालुक्यातील नेरपिंगळाई येथे छापा टाकून एका अवैध ऑनलाईन जुगाराच्या अड्ड्यावर धडक कारवाई केली आहे. या कारवाईत पोलिसांनी ११ जुगारी इसमांना रंगेहात पकडले असून, त्यांच्याकडून १ लाख १२ हजार ६० रुपयांचा मुद्देमाल जप्त करण्यात आला आहे.

कार कारवाईची सविस्तर पार्श्वभूमी

जिल्ह्यात अवैध धंदे करणाऱ्यांवर कठोर प्रतिबंधत्मक कारवाई करण्याचे स्पष्ट आदेश पोलीस अधीक्षक श्री. निकेतन कदम यांनी स्थानिक गुन्हे शाखेला दिले होते. त्यानुसार, दिनांक १७ ऑक्टोबर २०२६ रोजी स्थानिक गुन्हे शाखेच्या पथकाला गोपनीय बातमीदारामार्फत माहिती मिळाली की, ग्राम नेरपिंगळाई (ता. मोर्शी) येथील एका दुकानात काही व्यक्ती विनापरवाना व अवैधरित्या ऑनलाईन मशिनद्वारे पैशांची हारजित जुगार खेळत व खेळवत आहेत.

छापा आणि जप्त करण्यात आलेला मुद्देमाल

मिळालेल्या खात्रीशीर खबरेनुसार स्थानिक गुन्हे शाखेच्या पथकाने नेरपिंगळाई येथील संबंधित दुकानावर पंचासमक्ष अचानक छापा टाकला. यावेळी संगणकाच्या (कॉम्प्युटर) स्क्रीनवर येणाऱ्या आकड्यांवर पैसे लावून हारजितचा जुगार खेळणारे एकूण ११ जुगारू इसम घटनास्थळावरच रंगेहात सापडले.

पोलिसांनी घटनास्थळावरून खालीलप्रमाणे मुद्देमाल जप्त केला आहे:

• रोख रक्कम: ८,४६० रुपये

  
  

  

  
  

• इलेक्ट्रॉनिक साहित्य: ऑनलाईन जुगार खेळण्यासाठी वापरण्यात आलेले संगणक (कॉम्प्युटर) आणि इतर जुगाराचे साहित्य.

• एकूण जप्त मुद्देमाल: १,१२,०६० रुपये.

  
  

  

  
  

मुख्य आरोपी आणि गुन्हा दाखल

घटनास्थळावर पकडलेल्या आरोपींकडे कसून चौकशी केली असता, हे ऑनलाईन जुगाराचे दुकान अर्जुन तंवर (रा. नेरपिंगळाई, ता. मोर्शी) याच्या मालकीचे असल्याचे निष्पन्न झाले. सध्या मुख्य आरोपी अर्जुन तंवर हा फरार असून, त्याच्या शोधासाठी पोलीस पथक कार्यरत आहे.

या प्रकरणी ताब्यात घेण्यात आलेल्या आरोपींपैकी एकाची मुख्य ओळख खालीलप्रमाणे आहे:

१. करण हरिसिंग तंवर (वय ३२ वर्ष, रा. नेरपिंगळाई, ता. मोर्शी) 

सदर सर्व आरोपींविरुद्ध पोलीस स्टेशन शिरखेड येथे महाराष्ट्र जुगार प्रतिबंध अधिनियम कलम अन्वये गुन्हा नोंदविण्यात आला असून पुढील कायदेशीर कारवाई सुरू आहे.

मार्गदर्शक व कारवाई करणारे पथक

ही धडक कारवाई अमरावती ग्रामीणचे पोलीस अधीक्षक निकेतन कदम (भा.पो.से.) आणि अपर पोलीस अधीक्षक  दत्ता तोटेवाड यांच्या मार्गदर्शनाखाली, स्थानिक गुन्हे शाखेचे पोलीस निरीक्षक अशोक लांडे यांच्या नेतृत्वात पार पडली.

या पथकामध्ये पोलीस उपनिरीक्षक आकाश शिवणकर, पोलीस अंमलदार रूपेश गांवडे, विवेक घोरमाडे, शांताराम सोनाने आणि चालक प्रशिक्षक वानखडे यांनी सहभाग घेऊन यशस्वी कारवाई फत्ते केली.