नागपूर: एमआयडीसी पोलिसांकडून ३ दुचाकी जप्त; १६ वर्षांचा अल्पवयीन चोरटा गजाआड

नागपूर : एमआयडीसी पोलिसांची मोठी कामगिरी; वाहन चोरीच्या ३ गुन्ह्यांचा उलगडा, १६ वर्षांचा अल्पवयीन मुलगा ताब्यात

नागपूर (विशेष प्रतिनिधी): शहर पोलिसांच्या एमआयडीसी पोलीस ठाण्याच्या हद्दीत घडलेल्या वाहन चोरीच्या गुन्ह्यांची उकल करण्यात पोलिसांना मोठे यश आले आहे. तांत्रिक तपासाच्या आधारे पोलिसांनी एका १६ वर्षीय अल्पवयीन बालकाला ताब्यात घेतले असून त्याच्याकडून चोरीच्या ३ दुचाकी जप्त करण्यात आल्या आहेत. जप्त करण्यात आलेल्या वाहनांची एकूण किंमत सुमारे १ लाख ६० हजार रुपये आहे.

घटनेची पार्श्वभूमी आणि पोलीस कारवाई: एकता नगर (राधाकृष्ण मंदिरामागे, एमआयडीसी) येथील रहिवासी तक्रारदार अजय रतनलाल मातरे (वय २८) यांची लाल रंगाची ‘होंडा १२५ एचपी’ दुचाकी (क्रमांक MP 22 ZH 5167, किंमत ₹६०,०००) १८ ऑगस्ट २०२६ च्या रात्री ११:३० ते १९ ऑगस्ट २०२६ च्या सकाळी ०७:०० या वेळेत राहत्या घरासमोरून चोरीला गेली होती. तक्रारीवरून एमआयडीसी पोलीस ठाण्यात भारतीय न्याय संहिता (BNS) कलम ३०३(२) अन्वये अज्ञात चोराविरुद्ध गुन्हा दाखल करण्यात आला होता.

तपासात चोऱ्यांचा खुलासा: गुन्ह्याचा तपास करत असताना एमआयडीसी पोलिसांच्या तपास पथकाने गोपनीय व तांत्रिक माहिती गोळा केली. या माहितीच्या आधारे एका १६ वर्षीय अल्पवयीन मुलाला त्याच्या पालकांसमक्ष ताब्यात घेऊन विचारपूस केली असता, त्याने सदर गुन्ह्याची कबुली दिली.

अधिक चौकशीदरम्यान त्याने एमआयडीसी व वाडी पोलीस ठाण्याच्या हद्दीतून आणखी दोन वाहने चोरल्याचे उघडकीस आणले.

• एमआयडीसी हद्द: ‘हिरो होंडा स्प्लेंडर’ (क्रमांक MH 31 BJ 8197, किंमत ₹५०,०००)

  
  

  

  
  

• वाडी हद्द: ‘हिरो होंडा सीबी शाईन’ (क्रमांक MH 31 FK 6616, किंमत ₹५०,०००)

१.६० लाखांचा मुद्देमाल जप्त:

विधिसंघर्षग्रस्त बालकाच्या ताब्यातून पोलिसांनी तिन्ही दुचाकी (एकूण किंमत ₹१,६०,०००/-) जप्त केल्या असून या प्रकरणाचा पुढील तपास पोलीस करत आहेत.

तपास पथकाची कामगिरी:

ही कारवाई अपर पोलीस आयुक्त  वसंत परदेशी, पोलीस उप आयुक्त (परीमंडळ १) सिंगा रेड्डी ऋषिकेश रेड्डी आणि सहायक पोलीस आयुक्त (एमआयडीसी विभाग) यशवंत नलावडे यांच्या मार्गदर्शनाखाली करण्यात आली. वरिष्ठ पोलीस निरीक्षक गोकुल महाजन, पोलीस उपनिरीक्षक पंकज सयाम, पोलीस हवालदार प्रमोद गिरी, विक्रांत देशमुख, प्रविण फलके, प्रमोद सोनोने आणि पोलीस अंमलदार अंकुश कनोजीया यांनी ही यशस्वी कारवाई केली.