हातभट्टीवाला विशाल गौपालेवर एम.पी.डी.ए. कायद्यान्वये कठोर कारवाई; भंडारा जिल्हा कारागृहात रवानगी

भंडारा

दिनांक ०३ नोव्हेंबर २०२६: तुमसर तालुक्यातील कुख्यात हातभट्टी दारू विक्रेता विशाल राजेश गौपाले याच्यावर प्रशासनाने मोठी कारवाई केली आहे. समाजविघातक कृत्यांमुळे परिसरात दहशत निर्माण करणाऱ्या या सराईत गुन्हेगाराची एम.पी.डी.ए. (MPDA) कायद्यान्वये भंडारा जिल्हा कारागृहात रवानगी करण्यात आली आहे. विशेष म्हणजे, चालू वर्षात या कठोर कायद्यांतर्गत कारागृहात पाठवलेला हा सातवा आरोपी आहे.

गुन्हेगारी पार्श्वभूमी आणि परिसरातील दहशत

गोबरवाही पोलीस स्टेशन अंतर्गत येणाऱ्या नाकाडोंगरी (ता. तुमसर, जि. भंडारा) येथील २१ वर्षीय विशाल गौपाले हा मागील तीन वर्षांपासून मोहफुलाची हातभट्टी दारू गाळणे आणि विक्री करण्याच्या व्यवसायात सक्रिय होता. त्याच्यावर गोबरवाही पोलीस ठाण्यात अनेक गुन्हे नोंद आहेत. गुन्ह्यातून कमावलेल्या पैशांच्या बळावर त्याने साक्षीदारांना आमिष दाखवून यापूर्वी न्यायालयातून स्वतःची निर्दोष सुटकाही करून घेतली होती.

त्याच्या या अवैध धंद्यामुळे नाकाडोंगरी आणि आजूबाजुच्या परिसरातील शाळकरी व तरुण मुले दारूच्या आहारी जात होती, ज्यामुळे तरुण पिढी गुन्हेगारी प्रवृत्तीकडे वळत होती. यामुळे सार्वजनिक सुव्यवस्था पूर्णपणे धोक्यात आली असून नागरिकांमध्ये भीतीचे वातावरण व प्रचंड दहशत निर्माण झाली होती.

जिल्हाधिकाऱ्यांचे स्थानबद्धतेचे आदेश

अशा गुन्हेगारी प्रवृत्तीच्या व्यक्तीवर अंकुश ठेवणे गरजेचे असल्याने, जिल्हा पोलीस अधीक्षक श्री. नूरूल हसन यांच्या मार्गदर्शनाखाली विशाल गौपाले याच्याविरोधात एम.पी.डी.ए. कायद्यान्वये प्रस्ताव तयार करण्यात आला. या प्रस्तावाची गंभीर दखल घेत भंडाराचे जिल्हाधिकारी श्री. सावन कुमार यांनी दिनांक ०२ नोव्हेंबर २०२६ रोजी आरोपीला स्थानबद्ध करून जिल्हा कारागृह, भंडारा येथे डांबण्याचे आदेश पारित केले. पोलीस प्रशासनाने स्पष्ट केले आहे की, यापुढेही हातभट्टी दारू तयार करणाऱ्या व विकणाऱ्या गुन्हेगारांची खातरजमा करून त्यांच्यावर अशाच कठोर कारवाया सुरूच राहतील.

पोलीस प्रशासनाची धडक कारवाई

सदर महत्त्वाची कारवाई खालील अधिकारी व अंमलदारांच्या पथकाने यशस्वीरीत्या पार पाडली:

• मार्गदर्शन: नूरूल हसन (पोलीस अधीक्षक, भंडारा), निलेश मोरे (अपर पोलीस अधीक्षक), महेश पाटील (उपविभागीय पोलीस अधिकारी, तुमसर).

  
  

  

  
  

• कारवाईत सहभागी अधिकारी व कर्मचारी:  संजय गायकवाड (पोलीस निरीक्षक, स्थानिक गुन्हे शाखा भंडारा),  अभिजीत पाटील (ठाणेदार, पोलीस स्टेशन गोबरवाही), पो.शि. कोमल ईश्वरकर (ब.न. ४१८, स्थानिक गुन्हे शाखा), आणि पो.शि. नेपाल गभने (ब.न. १२९२, पोलीस स्टेशन गोबरवाही).