अमरावती ग्रामीण एलसीबीची धडक कारवाई: जुगार आणि अवैध दारू धंद्यांवर छापे, ₹५.६६ लाखांचा मुद्देमाल जप्त

अमरावती: अमरावती ग्रामीण जिल्ह्यातील अवैध धंद्यांवर व गुन्हेगारीवर चाप लावण्यासाठी पोलीस अधीक्षक निकेतन कदम यांनी दिलेल्या कडक निर्देशांनुसार स्थानिक गुन्हे शाखेच्या (LCB) पथकांनी धडक कारवाई केली आहे. चांदूर रेल्वे, मोर्शी शहर आणि हिवरखेड येथे टाकलेल्या छाप्यात जुगार अड्डे व अवैध दारू वाहतुकीचा एकूण ₹५,६६,९०० चा मुद्देमाल जप्त करण्यात आला असून अनेक आरोपींवर गुन्हे दाखल करण्यात आले आहेत.

१. चांदूर रेल्वे मारवाडी लाईन येथे जुगार अड्ड्यावर धाड

स्थानिक गुन्हे शाखेला मिळालेल्या गोपनीय माहितीच्या आधारे चांदूर रेल्वे पोलीस ठाण्याच्या हद्दीतील मारवाडी लाईन परिसरात ५२ ताश पत्त्यांवर जुगार खेळणाऱ्या अड्ड्यावर धाड टाकण्यात आली.

• आरोपी: मुख्य आरोपी चंदन उर्फ भल्ला सुरेश मारोटे (वय ४१, रा. मारवाडी लाईन, चांदूर रेल्वे) याच्यासह एकूण ७ जणांवर कारवाई करण्यात आली.

  
  

  

  
  

• जप्त मुद्देमाल: ₹२४,५८० रोख आणि ₹६०,००० किमतीची एक मोटारसायकल असा एकूण ₹८४,५८० चा ऐवज जप्त करण्यात आला.

• कायदेशीर कारवाई: आरोपींविरुद्ध  जुगार प्रतिबंधक कायद्यानुसार गुन्हा नोंदवला आहे.

  
  

  

  
  

२. मोर्शी बस डेपो परिसरात अवैध देशी दारू जप्त

मोर्शी पोलीस ठाण्याच्या हद्दीतील जुना बस डेपो परिसरात विनापरवाना देशी दारूची वाहतूक केली जात असल्याचे समोर आले. LCB च्या पथकाने सापळा रचून ही कारवाई केली.

• आरोपी: अजय साहेबराव धुर्वे (वय २५, रा. गिट्टीखदान, मोर्शी) याच्यासह ३ जणांना ताब्यात घेण्यात आले.

• जप्त मुद्देमाल: १८० मिली क्षमतेच्या २ पेट्या देशी दारू (किंमत ₹९,६००) आणि वाहतुकीसाठी वापरलेली एक मोटारसायकल (किंमत ₹७०,०००) असा ₹७९,६०० चा मुद्देमाल जप्त झाला.

• कायदेशीर कारवाई: आरोपींवर  महाराष्ट्र दारूबंदी कायद्यान्वये गुन्हा दाखल करण्यात आला.

३. हिवरखेड येथे मोठा छापा; ७ जुगारी पकडले

मोर्शी तालुक्यातील ग्राम हिवरखेड येथे मोकळ्या जागेत ५२ ताश पत्त्यांवर चालणाऱ्या मोठ्या जुगार अड्ड्यावर स्थानिक गुन्हे शाखेने धाड टाकली.

• आरोपी: मुख्य आयोजक किशोर लक्ष्मणराव शिंदे (वय ४८, रा. हिवरखेड) याच्यासह एकूण ७ आरोपींना जागीच पकडण्यात आले.

• जप्त मुद्देमाल: ₹११,४७० रोख, ₹४१,००० किमतीचे ५ मोबाईल फोन, ₹३,५०,००० किमतीच्या ५ मोटारसायकली, ताश पत्ते आणि ताडपत्री असा ₹४,०२,७२० चा मोठा मुद्देमाल जप्त करण्यात आला.

• कायदेशीर कारवाई: या प्रकरणी  महाराष्ट्र जुगार प्रतिबंधक कायद्यानुसार गुन्हा दाखल झाला आहे.

पोलीस पथकाची कामगिरी:

ही विशेष कारवाई अमरावती ग्रामीणचे पोलीस अधीक्षक निकेतन कदम यांच्या आदेशाने, अपर पोलीस अधीक्षक  दत्ता तोटेवाड यांच्या मार्गदर्शनाखाली पार पडली. स्थानिक गुन्हे शाखेचे पोलीस निरीक्षक  अशोक लांडे यांच्या नेतृत्वात पोउपनि. आकाश शिवणकर, पोउपनि. रोहित कुदळे व त्यांच्या पथकाने ही धाडसी कामगिरी केली.