वर्धा शहर पोलिसांची धडाकेबाज कामगिरी; मोटर सायकल चोरीचे २ गुन्हे उघड, ७० हजारांच्या गाड्यांसह अमरावतीच्या चोराला अटक
वर्धा शहर पोलिसांच्या गुन्हे शोध पथकाने (डी. बी. पथक) मोटर सायकल चोरीच्या दोन गुन्ह्यांचा छडा लावत एका सराईत चोराला अटक केली आहे. त्याच्याकडून ७०,००० रुपये किमतीच्या दोन मोटर सायकल जप्त करण्यात आल्या आहेत.
पहिली घटना आणि गुन्हा नोंद: समतानगर, सावंगी मेघे येथील रहिवासी धर्मपाल महादेवराव पाटील (वय ४० वर्षे) यांनी २५ जून २०२६ रोजी रात्री ९:०० वाजताच्या सुमारास त्यांची ५०,००० रुपये किमतीची निळ्या रंगाची होंडा लिवो मोटर सायकल (क्र. MH-32 AG-3999) बजाज चौक येथे उभी केली होती. अज्ञात चोरट्याने ती चोरून नेल्याने, त्यांच्या तक्रारीवरून वर्धा शहर पोलीस ठाण्यात गुन्हा दाखल करण्यात आला होता.सदर धडाकेबाज कामगिरी वर्धा जिल्ह्याचे पोलीस अधीक्षक सौरभ कुमार अग्रवाल, अपर पोलीस अधीक्षक सदाशिव वाघमारे आणि उपविभागीय पोलीस अधिकारी सुनील महाडीक यांच्या मार्गदर्शनाखाली करण्यात आली.
सीसीटीव्ही फुटेज आणि गुप्त माहितीच्या आधारे आरोपीला अटक: पोलीस निरीक्षक नागेशकुमार चतुरकर यांनी या गुन्ह्याच्या तपासासाठी एक विशेष पथक नेमले होते. पथकाने परिसरातील सीसीटीव्ही फुटेज आणि गोपनीय बातमीदारांकडून मिळालेल्या खात्रीशीर माहितीच्या आधारे तपास सुरू केला. अमरावती शहर पोलिसांच्या मदतीने संशयित आरोपी सैय्यद दानिश अली सैय्यद जावेद अली (वय २७ वर्षे, रा. आजादनगर, अमरावती) याला चोरीच्या मोटर सायकलसह ताब्यात घेण्यात आले. पोलिसांनी त्याच्याकडून ५०,००० रुपयांची होंडा लिवो गाडी जप्त करून त्याला अटक केली.
दुसऱ्या चोरीचा खुलासा: न्यायालयाने आरोपीला ३ दिवसांची पोलीस कोठडी (पीसीआर) सुनावली. कोठडी दरम्यान पोलिसांनी त्याची कसून चौकशी केली असता, त्याने दोन ते अडीच महिन्यांपूर्वी वर्ध्याच्या जेल रोडवरील पोस्ट ऑफिस चौकातून आणखी एक मोटर सायकल चोरी केल्याची कबुली दिली.
तपास केला असता, ही गाडी विजय मधुकर रामटेके (वय ४५ वर्षे, रा. समतानगर, वर्धा) यांच्या मालकीची असल्याचे समोर आले. या चोरीबाबत १५ एप्रिल २०२६ रोजीच वर्धा शहर ठाण्यात गुन्हा (अपराध क्र. ३९८/२०२६, कलम ३०३(३) बीएनएस) नोंद होता. पोलिसांनी आरोपीच्या ताब्यातून २०,००० रुपये किमतीची ही हिरो होंडा मोटर सायकल (क्र. MH-27 BD-7880) देखील जप्त केली.
एकूण जप्त मुद्देमाल: आरोपीकडून पोलिसांनी एकूण ७०,००० रुपये किमतीच्या २ मोटर सायकल जप्त केल्या आहेत.
कारवाई करणारे पोलीस पथक: वर्धा शहरचे ठाणेदार पो.नि. नागेशकुमार चतुरकर यांच्या निर्देशानुसार गुन्हे शोध पथकाचे पोलीस उपनिरीक्षक शरद गायकवाड, राजेंद्र हाडके, प्रशांत बंजारी, नरेंद्र कांबळे, वैभव जाधव, श्रावण पवार, राजेश डाळ, संतोष ईघरे आणि चेतन दुबे यांनी महत्त्वाची भूमिका बजावली.
