नागपुरात ‘ऑपरेशन ऑल आऊट’ दरमयान अंमली पदार्थांच्या गोळ्या व शस्त्रांसह ५,८६२ रुपयांचा मुद्देमाल जप्त; आरोपींना अटक

नागपूर: नागपूर शहर पोलीस आयुक्तांच्या आदेशानुसार संपूर्ण नागपूर शहरात १३ ऑगस्ट २०२६ च्या रात्री ११:०० वाजेपासून ते १४ ऑगस्ट २०२६ च्या पहाटे ०२:०० वाजेदरम्यान विशेष ‘ऑपरेशन ऑल आऊट’ राबवण्यात आले.

या मोहिमेदरम्यान, १३ ऑगस्ट रोजी रात्री ११:१५ वाजेच्या सुमारास गुन्हे शाखा युनिट क्र. ५ चे अधिकारी आणि अंमलदार कळमणा पोलीस ठाण्याच्या हद्दीत गस्त घालीत असताना त्यांना गोपनीय माहिती मिळाली. कळमणा हद्दीतील प्लॉट क्र. ५, गुलशननगर, नाग मंदिराजवळ राहणारा आरोपी संतोष उर्फ मामा उर्फ कुबडा राजुदास यादव (वय ३१ वर्षे) हा आपल्या घरी प्रतिबंधित अंमली पदार्थांच्या गोळ्या बाळगून असल्याची खात्रीशीर माहिती पोलिसांना मिळाली.

छाप्यात सापडला साठा आणि शस्त्रे

माहितीच्या आधारे पोलिसांनी आरोपी संतोष यादव याच्या राहत्या घराची झडती घेतली. झडतीदरम्यान त्याच्याकडे NITZASCEN-10 NITRAZEPAM TABLETS (प्रति स्ट्रिप किंमत ₹४५/-) ज्यावर ‘शेड्युल एच १ प्रिस्क्रिप्शन ड्रग’ असे नमूद असलेल्या प्रतिबंधित गोळ्या आढळून आल्या. या गोळ्यांबाबत विचारणा केली असता आरोपीकडे कोणताही वैध परवाना नव्हता.

चौकशीत आरोपीने सांगितले की, त्याने या गोळ्या आरोपी क्र. १ सुमित राजुदास यादव (वय २५ वर्षे, रा. गुलशननगर) आणि शेट्टी नावाचा इसम यांच्या मदतीने आणल्या होत्या.

तसेच घरझडतीदरम्यान पोलिसांना:

• १ लोखंडी कोयता

  
  

  

  
  

• १ लोखंडी चाकू

• २ स्टीलचे चाकू

  
  

  

  
  

अशी घातक शस्त्रे देखील मिळून आली. पोलिसांनी आरोपीच्या ताब्यातून प्रतिबंधित गोळ्या आणि ४ शस्त्रे असा एकूण ५,८६२ रुपये किंमतीचा मुद्देमाल जप्त केला.

गुन्हा दाखल व आरोपींना अटक

आरोपी स्वतःच्या आर्थिक फायद्यासाठी प्रतिबंधित नशा आणणाऱ्या गोळ्या व बेकायदेशीर शस्त्रे बाळगत असताना रंगेहात पकडला गेला. आरोपींचे हे कृत्य एन.डी.पी.एस. ॲक्ट (NDPS Act) आणि भारतीय हत्यार कायद्याच्या विविध कलमांनुसार गुन्हा ठरणारे असल्याने पोलीस ठाणे कळमणा येथे गुन्हा नोंदवून आरोपींना अटक करण्यात आली आहे. या प्रकरणातील इतर पाहिजे असलेल्या आरोपींचा शोध व पुढील तपास सुरू आहे.

तपास पथक

ही धडक कारवाई अपर पोलीस आयुक्त (गुन्हे)  राजेंद्र दाभाडे, पोलीस उप आयुक्त  दीपक अग्रवाल आणि सह. पोलीस आयुक्त (गुन्हे शाखा) वैभव जाधव यांच्या मार्गदर्शनाखाली करण्यात आली.

कारवाईत सहभागी पथक:

पो.नि. विनायक गोल्हे, पोहवा चंद्रशेखर गौतम, राजु टाकळकर, शेख नजीर, गणेश ठाकरे, दीपक बावणकर, विशाल नागभिडे, रोशन तांडुलकर, लिलाधर खिरटकर, सुधिर तिवारी आणि आशिष पवार यांनी ही यशस्वी कामगिरी पार पाडली.