नेरमध्ये खाकीची धडक कारवाई; ७,३०० रुपयांच्या गांजा तस्कर जेरबंद

यवतमाळ:

जिल्ह्यात अंमली पदार्थांच्या अवैध विक्रीविरोधात पोलीस प्रशासनाने कंबर कसली असून, स्थानिक गुन्हे शाखेच्या पथकाने नेर शहरात मोठी कारवाई केली आहे. नेर ते दारव्हा रोडवरील मुस्लिम कब्रस्तानजवळ अवैधरीत्या गांजाची विक्री करणाऱ्या एका तस्कराला पोलिसांनी रंगेहात अटक केली असून, त्याच्याकडून १४६ ग्रॅम गांजा जप्त करण्यात आला आहे.

घटना नेमकी कशी घडली?

स्थानिक गुन्हे शाखेच्या पथकाला ७ नोव्हेंबर २०२६ रोजी मिळालेल्या गोपनीय माहितीनुसार, नेर येथील चमन नगरमध्ये राहणारा शेख जफर शेख जब्बार (वय ३६) हा इसम नेर-दारव्हा रोडवरील मुस्लिम कब्रस्तानजवळ गांजाची विक्री करत असल्याची खात्रीशीर माहिती मिळाली. या माहितीच्या आधारे वरिष्ठ अधिकाऱ्यांच्या मार्गदर्शनाखाली पोलीस पथकाने पंचांसमक्ष संबंधित ठिकाणी सापळा रचून कारवाई केली.

संशयित इसमाची झडती घेतली असता, त्याच्याकडे पॅकिंगसह १६२ ग्रॅम (निव्वळ गांजा १४६ ग्रॅम) गांजासदृश अंमली पदार्थ आढळून आला.

जप्त मुद्देमाल व कायदेशीर कारवाई

• जप्त पदार्थ: हिरव्या रंगाची पाने, बिया व फुले असलेला गांजा (निव्वळ वजन: १४६ ग्रॅम).

• अंदाजे किंमत: ७,३०० रुपये.

  
  

  

  
  

• गुन्हा: आरोपीविरुद्ध पोलीस स्टेशन नेर येथे अंमली पदार्थ व मनः प्रभावी पदार्थ अधिनियम (N.D.P.S. Act)  अन्वये गुन्हा दाखल करण्यात आला आहे. पुढील तपास नेर पोलीस करत आहेत.

कारवाई करणारे पथक

पोलीस अधीक्षक  कुमार चिंता, अपर पोलीस अधीक्षक अशोक थोरात आणि स्थानिक गुन्हे शाखेचे पोलीस निरीक्षक सतीष चवरे यांच्या मार्गदर्शनाखाली पोलीस उपनिरीक्षक शिवशंकर कायंदे, अंमलदार सोहेल मिर्झा, कुनाल मुंडोकार, मिथुन जाधव, सचिन मलाये, अमित झेंडेकर, पवन ढवळे तसेच चालक पोलीस अंमलदार जितेन्द्र चौधरी यांनी ही यशस्वी कामगिरी पार पाडली.