अकोल्यात ‘ऑपरेशन प्रहार’: अवैध गॅस रिफिलिंग रॅकेटचा पर्दाफाश, २ अटकेत

अकोला (विशेष प्रतिनिधी):

जिल्ह्यात अवैध धंद्यांवर व बेकायदेशीर कृत्यांवर लगाम घालण्यासाठी पोलीस अधीक्षक अर्चित चांडक यांच्या संकल्पनेतून ‘ऑपरेशन प्रहार’ राबवले जात आहे. या मोहिमेअंतर्गत स्थानिक गुन्हे शाखेने (LCB) धडक कारवाई करत, घरगुती वापराच्या गॅस सिलिंडरमधून ऑटो रिक्षांमध्ये अत्यंत बेकायदेशीर व धोकादायक पद्धतीने गॅस रिफिलिंग करणाऱ्या रॅकेटचा भांडाफोड केला आहे. या कारवाईत २ जणांना अटक करण्यात आली असून २ लाख ३५ हजार ५०० रुपयांचा ऐवज जप्त करण्यात आला आहे.

 धाडसी कारवाईचा घटनाक्रम

स्थानिक गुन्हे शाखेचे पथक २२ ऑक्टोबर २०२६ रोजी हद्दीत गस्त घालत असताना, त्यांना गुप्त बातमीदाराकडून महत्त्वपूर्ण माहिती मिळाली. सिव्हील लाईन पोलीस स्टेशनच्या हद्दीतील जगजीवन रामनगर, टेलिफोन कॉलनी (दुबे वाडी) येथील रहिवासी मनोज दीक्षित हा आपल्या घराजवळील पत्र्याच्या शेडमध्ये बेकायदेशीरपणे घरगुती गॅस सिलिंडरमधून ऑटोमध्ये गॅस भरत असल्याचे समजले.

माहिती मिळताच पथकाने लागलीच घटनास्थळी धाड टाकली. त्या ठिकाणी ऑटो रिक्षात अवैधपणे गॅस रिफिलिंग करताना दोन जण रंगेहात पकडले गेले.

 ताब्यात घेतलेले आरोपी

१. मनोज रमेश दीक्षित (वय ३६ वर्षे) – रा. जगजीवन रामनगर, टेलिफोन कॉलनी, दुबे वाडी, अकोला.

२. विनोद नारायण गेडाम (वय ४६ वर्षे, ऑटोचालक) – रा. अशोक नगर, अकोट फाईल, अकोला.

जप्त करण्यात आलेला ऐवज (एकूण किंमत ₹ २,३५,५००/-)

पोलीस पथकाने घटनास्थळावरून खालील मुद्देमाल हस्तगत केला:

• गॅस सिलिंडर (एकूण १६ नमुने):

  
  

  

  
  

  • भारत गॅस: ५ रिकामे कमर्शियल सिलिंडर, ४ भरलेले घरगुती सिलिंडर आणि ६ रिकामे घरगुती सिलिंडर.

  • HP गॅस: १ भरलेला घरगुती सिलिंडर.

• रिफिलिंग साहित्य: १ Neo कंपनीची पिवळ्या-काळ्या रंगाची H-P रिफिलिंग मशीन (प्लास्टिक नळीसह).

• इलेक्ट्रॉनिक काटा: १ Sansui कंपनीचा वजन काटा.

• वाहन: १ बजाज कंपनीचा ऑटो रिक्षा (क्रमांक MH-30-AA-6887).

 कायदेशीर कारवाई

अटक करण्यात आलेले दोन्ही आरोपी आणि जप्त केलेला मुद्देमाल पुढील कायदेशीर कारवाईसाठी सिव्हील लाईन पोलीस ठाणे, अकोला यांच्या स्वाधीन करण्यात आला आहे. आरोपींविरुद्ध जीवनावश्यक वस्तू कायदा (E.C. Act) १९५५ चे कलम ३ व ७ अन्वये गुन्हा दाखल करण्यात आला आहे.

 पोलीस पथक

सदरची यशस्वी कारवाई अकोला पोलीस अधीक्षक अर्चित चांडक व अप्पर पोलीस अधीक्षक  बी. चंद्रकांत रेड्डी यांच्या मार्गदर्शनाखाली स्थानिक गुन्हे शाखेचे पोलीस निरीक्षक नितीन लेव्हलकर आणि त्यांच्या टीमने (अधिकारी निलेश देशमुख, गोपाळ जाधव, विष्णु बोडखे, माजीद पठाण, अनिल चव्हाण व इतर अमंलदार) केली आहे.