अमरावती शहरात खळबळ: खोलापुरी गेट पोलिसांनी केली १४ गोवंशांची सुटका; एकावर गुन्हा दाखल

अमरावती 

अमरावती शहर पोलीस आयुक्तांच्या मार्गदर्शनाखाली खोलापुरी गेट पोलीस ठाण्याच्या पथकाने एका ठिकाणी छापा टाकून १४ गोवंश जनावरांची सुटका केली आहे. मिर्झा पार्क परिसरातील एका घरामध्ये हा गोवंश अत्यंत क्रूरपणे आणि अन्न-पाण्याशिवाय कोंबून ठेवण्यात आला होता. या प्रकरणी एका आरोपीविरोधात गुन्हा दाखल करण्यात आला असून जप्त करण्यात आलेल्या जनावरांची किंमत अंदाजे २ लाख ८० हजार रुपये असल्याचे पोलिसांनी सांगितले.

गुप्त माहितीवरून धडक कारवाई

पोलिसांकडून मिळालेल्या माहितीनुसार, १० ऑक्टोबर २०२६ रोजी खोलापुरी गेट पोलीस ठाण्याचे अधिकारी व अंमलदार हद्दीत पेट्रोलिंग करत असताना आणि अवैध धंद्यांवर कारवाई करत असताना एक गोपनीय बातमी मिळाली. मिर्झा पार्क येथील एका घरामध्ये अवैध रित्या गोवंश डांबून ठेवण्यात आल्याची ही माहिती होती. या माहितीची खात्री करून पोलिसांनी महापालिकेच्या पशुवैद्यकीय अधिकारी यांच्यासह तात्काळ घटनास्थळी छापा टाकला.

दोन खोल्यांमध्ये होता अमानुष छळ

घटनास्थळावरील एका उघड्या घरातील दोन खोल्यांची पाहणी केली असता, तिथे १४ लहान-मोठे गोवंश जातीचे जनावरे आढळले. या जनावरांना अत्यंत क्रूर वागणूक देऊन, छळ करत अन्न-पाण्याशिवाय कोंबून ठेवण्यात आले होते.

गोरक्षणमध्ये करण्यात आली रवानगी

या प्रकरणी पोलिसांनी घटनास्थळी उपस्थित पंच आणि मनपाचे पशुवैद्यकीय अधिकारी डॉ. नीलेश सोळंके यांच्या मदतीने सर्व १४ गोवंश जनावरे ताब्यात घेतली. ही जनावरे सुरक्षितपणे संगोपनासाठी दस्तूर नगर येथील गोरक्षणमध्ये पाठवण्यात आली आहेत.

आरोपीवर गुन्हा दाखल

याप्रकरणी पोलिसांनी शेख सुफियान शेख नदीम (वय २३ वर्षे, रा. सागर नगर, खोलापुरी गेट, अमरावती) याच्याविरुद्ध प्राणी छळ प्रतिबंधक अधिनियम (PCA Act) कलम ११(१)(ई) आणि ११(१)(एच) नुसार कायदेशीर कारवाई केली आहे.

पोलिसांची विशेष कामगिरी

सदरची ही यशस्वी कामगिरी पोलीस आयुक्त  राकेश ओला, पोलीस उपायुक्त श्याम घुगे, आणि राजापेठ विभागाचे सहायक पोलीस उपायुक्त संजय खताळे यांच्या मार्गदर्शनाखाली खोलापुरी गेट पोलीस ठाण्याच्या पथकाने पार पाडली. या पथकामध्ये वरिष्ठ पोलीस निरीक्षक सीमा दाताळकर, पोलीस उपनिरीक्षक गजानन लोकडे, सागर किटे, सहायक पोलीस उपनिरीक्षक रमेश निंबोरकर, पोलीस हवालदार रवींद्र भटकर, तसेच पोलीस कॉन्स्टेबल रुपेश काळे, रंजीत नाकट आणि अमोल नकाशे यांनी सहभाग घेतला होता.