वर्धा: कुख्यात गुंड ‘आर.डी.एक्स.’वर MPDA अंतर्गत कारवाई; येरवडा मध्यवर्ती कारागृहात रवानगी

वर्ध्यात कुख्यात गुंड ‘आर.डी.एक्स.’ याच्यावर MPDA अंतर्गत कारवाई; पुणे येथील येरवडा कारागृहात रवानगी

वर्धा: जिल्ह्यात कायदा व सुव्यवस्था अबाधित राखण्यासाठी आणि गुन्हेगारीवर वचक बसवण्यासाठी वर्धा पोलीस व जिल्हा प्रशासनाने बेधडक मोहीम हाती घेतली आहे. या मोहिमेअंतर्गत वर्धा शहरातील बोरगाव (मेघे) परिसरातील कुख्यात गुंड अक्षय ऊर्फ आर.डी.एक्स. दिगांबर पटेल/पटले (वय ३० वर्षे, रा. सातपुते लेआऊट, वर्धा) याच्यावर ‘एम.पी.डी.ए.’ (MPDA) कायद्यान्वये कठोर कारवाई करून त्याची येरवडा मध्यवर्ती कारागृह, पुणे येथे रवानगी करण्यात आली आहे.

गुन्हेगारीची पार्श्वभूमी आणि परिसरात दहशत

अक्षय ऊर्फ ‘आर.डी.एक्स.’ याच्यावर सन २०२२ पासून वर्धा (शहर) आणि सावंगी (मेघे) पोलीस ठाण्याच्या अभिलेखावर एकूण १६ गंभीर गुन्हे नोंद आहेत. यामध्ये प्रामुख्याने:

• गैरकायद्याची मंडळी जमवून जीवाने ठार मारण्याचा प्रयत्न करणे

• दरोडा टाकणे आणि प्राणघातक शस्त्रे बाळगणे

  
  

  

  
  

• हद्दपार असतानाही प्रतिबंधित क्षेत्रात प्रवेश करून धुमाकूळ घालणे, शिवीगाळ करणे व धमक्या देणे

• परिसरात दहशत निर्माण करून सार्वजनिक शांतता भंग करणे

  
  

  

  
  

सन २०१४ पासून त्याने स्थानिक परिसरात स्वतःची प्रचंड दहशत निर्माण केली होती. त्याच्या भीतीमुळे नागरिक आणि पीडित व्यक्ती पोलिसांत तक्रार देण्यासही धजावत नव्हते. यापूर्वी त्याच्यावर महाराष्ट्र पोलीस कायद्यान्वये हद्दपारीची आणि भारतीय नागरिक सुरक्षा संहितेअंतर्गत प्रतिबंधात्मक कारवाई करण्यात आली होती. मात्र, या कारवायांना न जुमानता तो सतत गुन्हे करतच होता.

गुन्हेगाराच्या सततच्या विघातक कृत्यांची दखल घेत ठाणेदार, वर्धा (शहर) यांनी पोलीस अधीक्षक सौरभ कुमार अग्रवाल यांच्यामार्फत जिल्हादंडाधिकारी वान्मथी सी. यांच्याकडे ‘स्थानबद्धतेचा’ (MPDA) प्रस्ताव सादर केला होता.

जिल्हादंडाधिकारी यांनी प्रस्तावाची गांभीर्याने दखल घेत १२ ऑगस्ट २०२६ रोजी अक्षय ऊर्फ आर.डी.एक्स. याच्याविरुद्ध स्थानबद्धतेचे आदेश जारी केले. त्यानुसार त्याची तात्काळ येरवडा मध्यवर्ती कारागृह, पुणे येथे रवानगी करण्यात आली.

गुन्हेगारांमध्ये भीतीचे वातावरण; प्रशासनाचा कडक इशारा

• महसूल व पोलीस विभागाचा समन्वय: गेल्या १ वर्षात दोन्ही विभागांच्या समन्वयामुळे जिल्ह्यात MPDA अंतर्गत धडक कारवाया सुरू आहेत.

• वर्ष २०२६ मधील ६ वी कारवाई: सन २०२५ मध्ये तब्बल १८ दारू विक्रेते, गुंड आणि वाळू माफियांवर MPDA अंतर्गत कारवाई करून त्यांची जेलमध्ये रवानगी करण्यात आली होती. तर वर्ष २०२६ मधील ही ६ वी कारवाई ठरली आहे.

आगामी सण आणि उत्सव शांततेत पार पडावेत यासाठी अवैध दारू विक्रेते, वाळू माफिया आणि असामाजिक तत्त्वांवर पुढेही अशीच कठोर कारवाई केली जाईल, असा कडक इशारा जिल्हाधिकारी वान्मथी सी. आणि पोलीस अधीक्षक सौरभ कुमार अग्रवाल यांनी दिला आहे.

कारवाई करणारी टीम

ही कारवाई पोलीस अधीक्षक सौरभ कुमार अग्रवाल, अपर पोलीस अधीक्षक सदाशिव वाघमारे, उपविभागीय पोलीस अधिकारी सुनील महाडीक व स्थानिक गुन्हे शाखेचे पोलीस निरीक्षक विनोद चौधरी यांच्या मार्गदर्शनाखाली अमोल आत्राम, आशिष महेशगौरी, पो.नि. नागेशकुमार चतरकर, पोउपनि शरद गायकवाड, वैशाली करमनकर, करिश्मा परचाके आणि वर्धा (शहर) पोलीस ठाण्याच्या पथकाने पार पाडली.