हिंगणघाट: ५.७ ग्रॅम ‘एमडी’ ड्रग्जसह २२ वर्षीय तरुणाला अटक
हिंगणघाट (जि. वर्धा): स्थानिक पोलीस स्टेशन हिंगणघाट येथील पोलीस निरीक्षक अनिल राऊत व गुन्हे प्रकटीकरण (DB) पथकाचे अंमलदार पोलीस स्टेशन परिसरात पेट्रोलिंग करत असताना, मिळालेल्या गुप्त बातमीदाराच्या खबरीवरून निशाणपुरा वार्ड परिसरात छापा मारून एका तरुणाकडून अमली पदार्थ (मॅफेड्रोन) जप्त करण्यात आला आहे.
माहिती व पोलीस कारवाई: पोलीस पेट्रोलिंग करत असताना मुखबिराकडून खात्रीशीर खबर मिळाली की, निशाणपुरा वार्ड, हिंगणघाट येथील रहिवासी हर्षल दिलीपराव गाठे (वय २२ वर्ष) हा त्याच्या राहत्या घराजवळील शेषशाही आखाड्याजवळ ‘मॅफेड्रोन’ नावाचा मनोव्यापारावर परिणाम करणारा अंमली पदार्थ स्वतः विक्री व सेवन करण्याच्या उद्देशाने लपवून विक्री करत आहे. खबरीमध्ये नमूद केलेल्या वर्णनानुसार (काळ्या-हिरव्या रंगाचे चेकचे शर्ट व काळ्या रंगाची पॅन्ट) पोलिसांनी पंचांसह शेषशाही आखाड्याजवळ सापळा रचला व संशयित इसमाला ताब्यात घेतले.
जप्त केलेला मुद्देमाल: पंचांसमक्ष घेतलेल्या कायदेशीर अंगझडतीमध्ये आरोपीकडून खालील साहित्य जप्त करण्यात आले:
-
मॅफेड्रोन (Mephedrone): प्लास्टिक पन्नीसह एकूण वजन ५.७० ग्रॅम (किंमत रु. २१,४४०/-)
-
स्मार्टफोन: ओपो (OPPO) कंपनीचा अँड्रॉइड मोबाईल (किंमत रु. १५,०००/-)
एकूण जप्त मुद्देमाल: रु. ३६,४४०/-
गुन्हा दाखल व पुढील तपास:
पंचनाम्याची कारवाई पूर्ण करून जप्त मुद्देमालासह आरोपी हर्षल गाठे याच्याविरुद्ध एनडीपीएस ॲक्ट (NDPS Act) अन्वये गुन्हा दाखल करण्यात आला आहे. सदर गुन्ह्याचा पुढील तपास पोलीस उपनिरीक्षक हरीहर सोनकुसरे करत आहेत.
कारवाई करणारे पथक:
ही संपूर्ण कारवाई पोलीस अधीक्षक सौरभकुमार अग्रवाल, अपर पोलीस अधीक्षक सदाशिव वाघमारे, उपविभागीय पोलीस अधिकारी सुशीलकुमार नायक व पोलीस निरीक्षक अनिल राऊत यांच्या मार्गदर्शनाखाली डी.बी. पथकाचे पोलीस हवालदार प्रशांत ठोंबरे, पो.ना. राजेश शेंडे, पो.शि. आशिष नेवारे, पो.शि. मंगेश वाघमारे आणि पो.शि. रोहित साठे यांनी पार पाडली.
