सातारा पोलिसांची मोठी कारवाई: गोळीबार करून पळून गेलेले २ अट्टल गुन्हेगार २४ तासांत अहिल्यानगरमधून गजाआड

सातारा स्थानिक गुन्हे शाखेने  एका मोठ्या कारवाईत, जीवे मारण्याच्या उद्देशाने गोळीबार करून पळून गेलेल्या दोन अट्टल गुन्हेगारांना अवघ्या २४ तासांच्या आत अहिल्यानगर (अहमदनगर) येथून अटक केली आहे.

पूर्ववैमनस्य आणि गोळीबार

कराड तालुक्यातील कालगाव येथील संतोष शंकर घोलप (वय ३७, रा. कालगाव, व्यवसाय: टिप्पर वाहतूक सप्लायर) यांना १७ जुलै २०२६ रोजी रात्री ११:४५ वाजण्याच्या सुमारास पोलीस अभिलेखावरील आरोपी सोमनाथ रमेश चव्हाण (रा. कालगाव) याने पैशांचा व्यवहार मिटवण्याच्या बहाण्याने फोन करून पेरले गावच्या हद्दीतील इंदोली ब्रिज जवळील पाणंद रस्त्यावर बोलावून घेतले.

संतोष घोलप तेथे पोहोचले असता, सोमनाथचा साथीदार योगेश सुदाम दीक्षित (रा. मसूर, ता. कराड) याने घोलप यांना शिवीगाळ करत धमकावण्यास सुरुवात केली. याच दरम्यान, सोमनाथ चव्हाण याने त्याच्या फॉर्च्युनर कारमधून पिस्तूल काढून संतोष घोलप यांना जीवे मारण्याच्या हेतूने दोन राउंड फायर केले. घोलप यांनी वार चुकवण्याचा प्रयत्न केला, परंतु गोळ्या त्यांच्या उजव्या आणि डाव्या पायाला लागल्याने ते गंभीर जखमी झाले.

पोलीस ठाण्यात गुन्हा दाखल

याप्रकरणी जखमी संतोष घोलप यांच्या फिर्यादीवरून उंब्रज पोलीस ठाण्यात आरोपींवर खालील कलमांनुसार गुन्हा दाखल करण्यात आला:

• भारतीय न्याय संहिता (BNS): कलम १०९(१) (खून करण्याचा प्रयत्न), ४९, ३५१(३), ३५२, ३(५)

• शस्त्र अधिनियम (Arms Act): कलम ३(१), २५

  
  

  

  
  

• महाराष्ट्र पोलीस अधिनियम: कलम ३७(१)(३)/१३५

अहिल्यानगरमधून २४ तासांत अटक

गुन्ह्याचे गांभीर्य ओळखून सातारा जिल्हा पोलीस अधीक्षक निखील पिंगळे आणि अपर पोलीस अधीक्षक डॉ. वैशाली कडूकर यांनी आरोपींना तात्काळ अटक करण्याचे आदेश स्थानिक गुन्हे शाखेचे पोलीस निरीक्षक विश्वजीत घोडके यांना दिले. त्यानुसार पोलीस उपनिरीक्षक चंद्रकांत पुजारी यांच्या नेतृत्वाखाली एक विशेष तपास पथक तयार करण्यात आले.

१८ जुलै २०२६ रोजी पोलीस निरीक्षक घोडके यांना गुप्त बातमीदारामार्फत माहिती मिळाली की, दोन्ही आरोपी अहिल्यानगर येथे पळून गेले आहेत. पथकाने तात्काळ अहिल्यानगर गाठले. तेथे तांत्रिक विश्लेषण  आणि साक्षीदारांकडे चौकशी करून आरोपींचा माग काढला असता, ते अहिल्यानगरमधील कायनेटिक चौकातील ‘हॉटेल साई सूर्या’ येथे लपून बसल्याचे निष्पन्न झाले. पोलिसांनी हॉटेलवर छापा टाकून सोमनाथ चव्हाण आणि योगेश दीक्षित या दोन्ही आरोपींना ताब्यात घेतले. पुढील कायदेशीर कारवाईसाठी त्यांना उंब्रज पोलिसांच्या स्वाधीन करण्यात आले आहे.

कारवाई करणारे पोलीस पथक

ही यशस्वी कामगिरी पोलीस अधीक्षक निखील पिंगळे, अपर पोलीस अधीक्षक डॉ. वैशाली कडूकर यांच्या मार्गदर्शनाखाली करण्यात आली.  या पथकात पोलीस निरीक्षक विश्वजीत घोडके, उंब्रज पोलीस ठाण्याचे सहाय्यक पोलीस निरीक्षक पंकज पवार, उपनिरीक्षक चंद्रकांत पुजारी, रमेश ठाणेकर, तसेच पोलीस अंमलदार अतिश घाडगे, संजय शिर्के, विजय कांबळे, शरद बेबले, लक्ष्मण जगधने, प्रवीण फडतरे, अविनाश चव्हाण, सुजीत भोसले, अमित झेंडे, स्वप्निल शिंदे, किरण जगताप, पृथ्वीराज जाधव, रोहित निकम, महेश निर्मळ, इरफान मुलाणी, विजय निकम, संजय धुमाळ आणि श्रीधर माने यांचा समावेश होता. या सर्व अधिकारी व अंमलदारांचे पोलीस अधीक्षकांनी विशेष अभिनंदन केले आहे.