वर्ध्यात ३.८७ ग्रॅम एम.डी. ड्रग्ससह एकाला अटक; वर्धा पोलिसांची मोठी कारवाई

वर्ध्यात शहर गुन्हे प्रकटीकरण पथकाची मोठी कारवाई; मॅफेड्रॉन (एम.डी.) ड्रग्ससह एकाला अटक

वर्धा: वर्धा शहर पोलीस ठाण्याच्या गुन्हे प्रकटीकरण पथकाने (DB) शहरात अवैध अंमली पदार्थांची विक्री करणाऱ्या एका आरोपीला रंगेहात पकडून मोठी कारवाई केली आहे. या कारवाईत पोलिसांनी आरोपीकडून सुमारे ५१,३५० रुपयांचा मुद्देमाल जप्त केला आहे.

ही यशस्वी कारवाई पोलीस अधीक्षक  सौरभ अग्रवाल, अप्पर पोलीस अधीक्षक सदाशिव वाघमारे, आणि उपविभागीय पोलीस अधिकारी  प्रमोद मकेश्वर यांच्या मार्गदर्शनात करण्यात आली.

गुप्त माहितीवरून लावला सापळा

दिनांक २०.०६.२०२६ रोजी रात्रीच्या सुमारास वर्धा शहर पोलीस ठाण्याचे पोलीस उपनिरीक्षक शरद गायकवाड हे नाईट पेट्रोलिंगवर असताना त्यांना एका गुप्त बातमीदाराकडून खात्रीशीर माहिती मिळाली. या माहितीच्या आधारे प्रभारी पोलीस निरीक्षक श्री. विलास पाटील यांच्या सूचनेनुसार पंच, मापारी, फॉरेन्सिक पथक आणि पोलीस कर्मचाऱ्यांसह वर्ध्यातील ईदगाह मैदान येथे तात्काळ सापळा (ट्रॅप) रचण्यात आला.

आरोपी आणि जप्त मुद्देमाल

ईदगाह मैदानावर संशयास्पद रित्या आढळलेल्या आरोपीची तपासणी व अंगझडती घेतली असता, त्याच्याकडे अवैध रित्या बाळगलेला मॅफेड्रॉन (एम.डी.) हा अंमली पदार्थ सापडला.

• अटक करण्यात आलेला आरोपी: शेख अमीर शेख हमीद (रा. आनंदनगर, वर्धा).

• जप्त केलेला मुद्देमाल:

  
  

  

  
  

  • ०३.८७ ग्रॅम मॅफेड्रॉन (एम.डी.) अंमली पदार्थ.

  • रोख रक्कम १९००/- रुपये.

    
    

    

    
    

  • दोन अँड्रॉइड मोबाईल फोन.

  • एकूण जप्त मुद्देमालाची किंमत ५१,३५० रुपये आहे.

मुख्य पुरवठादाराचे नाव आले समोर

पोलीस चौकशीदरम्यान आरोपी शेख अमीर याने कबुली दिली की, त्याने सदर एम.डी. ड्रग्ज रोशन सहारे (रा. आनंदनगर, वर्धा) याच्याकडून आणले होते आणि तो त्याच्या सांगण्यावरूनच शहरात याची विक्री (विक्रीत मदत) करत होता. पोलिसांनी एन.डी.पी.एस. (NDPS) कायद्यातील तरतुदींनुसार कारवाई करून आरोपीला अटक केली आहे. तसेच अटक करण्यात आलेल्या आरोपीवर यापूर्वी सुद्धा वेगवेगळ्या कलमांन्वये भरपूर गुन्हे दाखल असल्याची माहिती समोर आली आहे.

प्रत्यक्ष कारवाई करणारे पथक

पोलीस निरीक्षक विलास पाटील यांच्या उपस्थितीत गुन्हे प्रकटीकरण पथकाचे उपनिरीक्षक शरद गायकवाड, पोलीस अंमलदार गजेंद्र धर्मे, प्रशांत वंजारी, महेंद्र पाटील, अभिजीत वाघमारे, नितीन ईटकरे, श्रावण पवार, वैभव जाधव, रंजीत भुरसे आणि अमोल साळवन यांनी ही कामगिरी पार पाडली. पोलिसांच्या या कारवाईमुळे वर्धा शहर परिसरात एम.डी. ड्रग्जच्या अवैध विक्रीला आळा घालण्यात मोठे यश आले आहे.