रामनगर पोलिसांची धडक कारवाई; २ लाखांच्या दुचाकींसह चोरटा जेरबंद

वर्ध्यात रामनगर डी.बी. पथकाची धडक कारवाई; दुचाकी चोरणारा विधीसंघर्षित बालक ताब्यात, २ लाख रुपयांच्या २ मोटारसायकल जप्त

वर्धा: बँकेतील ड्युटी संपवून घरी परतताना जुनापाणी बस स्टॉपवर आराम करत असलेल्या व्यक्तीची पल्सर गाडी चोरणाऱ्या विधीसंघर्षित बालकाला रामनगर पोलिसांनी अत्यंत शिताफीने ताब्यात घेतले आहे. त्याच्याकडून केवळ चोरीची पल्सरच नाही, तर आणखी एक सुझुकी ॲक्सेस गाडीसुद्धा जप्त करण्यात आली आहे.सदरची कौतुकास्पद कामगिरी वर्धा जिल्ह्याचे पोलीस अधीक्षक सौरभ कुमार अग्रवाल , अप्पर पोलीस अधीक्षक सदाशिव वाघमारे , आणि उपविभागीय पोलीस अधिकारी प्रमोद मक्केश्वर  यांच्या मार्गदर्शनात करण्यात आली.

गुन्ह्याची थोडक्यात हकीकत

तक्रारदार हे वर्धा येथील बॅचलर रोडवरील स्टेट बँक ऑफ इंडिया (SBI) येथे मगन संग्रहालयासमोर ड्युटी करतात. दिनांक ०४ जून २०२६ रोजी नेहमीप्रमाणे सकाळी १०:०० वाजता ते ड्युटीवर आले आणि संध्याकाळी ६:०० वाजता ड्युटी संपवून आर्वी नाका, ज्ञानेश्वर मंदिर जवळील आपल्या रूमवर गेले.

रात्रीच्या वेळी ते आपल्या बजाज पल्सर १२५ (क्र. MH 32 VA 0058) या गाडीने ‘एस क्युब’ हॉटेलमध्ये जेवण करण्यासाठी जात होते. मात्र, वाटेत अचानक प्रकृती अस्वस्थ वाटू लागल्याने ते रात्री अंदाजे १०:३० वाजताच्या सुमारास जुनापाणी बस स्टॉपवर गाडी उभी करून आराम करण्यासाठी थांबले. तिथे त्यांना झोप लागली. अंदाजे एका तासानंतर जेव्हा त्यांना जाग आली, तेव्हा त्यांची १,००,००० रुपये किमतीची पल्सर गाडी तिथून गायब झाली होती. आजूबाजूला शोध घेऊनही गाडी न मिळाल्याने त्यांनी रामनगर पोलीस स्टेशन गाठून तक्रार नोंदवली. पोलिसांनी तात्काळ गुन्हा दाखल करून तपास सुरू केला.

गोपनीय माहितीच्या आधारे पोलिसांची धडक कारवाई

गुन्हा दाखल झाल्यानंतर रामनगर पोलीस स्टेशनच्या गुन्हे प्रगटीकरण पथकाने (DB Squad) वेगाने सूत्रे हलवली. तपासादरम्यान मिळालेल्या गोपनीय माहितीच्या आधारे पोलिसांनी एका विधीसंघर्षित बालकाला ताब्यात घेतले.

त्याची कसून चौकशी केली असता, त्याच्याकडून खालील मुद्देमाल जप्त करण्यात आला:

• पहिली गाडी: फिर्यादीची चोरी झालेली जुनी वापरती बजाज पल्सर १२५ (क्र. MH 32 VA 0058, चेसीस नं. MD2B68BX0SWC30876) – किंमत अंदाजे ₹१,००,०००.

  
  

  

  
  

• दुसरी गाडी: एक पांढऱ्या रंगाची सुझुकी ॲक्सेस १२५ RCABS (क्र. MH 31 GF 8333) – किंमत अंदाजे ₹१,००,०००.

एकूण जप्त मुद्देमाल: ₹२,००,००० (दोन लाख रुपये) किमतीच्या दोन मोटारसायकल. सध्या या गुन्ह्याचा तपास प्रगतीपथावर असून, या बालकाने आणखी काही चोऱ्या केल्या आहेत का, याचा शोध पोलीस घेत आहेत.

मार्गदर्शन व कामगिरी

रामनगर पोलीस स्टेशनच्या पोलीस निरीक्षक पौर्णिमा राखोंडे यांच्या निर्देशानुसार, गुन्हे प्रगटीकरण पथकाचे (DB Pathak):

• पोलीस उपनिरीक्षक (PSI): दिनेश कांबळे

• पोलीस अंमलदार: गजानन मस्के

• पोलीस अंमलदार: कैलास वालदे

• पोलीस अंमलदार: विशाल देवकाते यांनी ही यशस्वी कारवाई पूर्ण केली. पोलिसांच्या या कामगिरीमुळे वाहन चोरांमध्ये धडकी भरली आहे