खोलापूर पोलिसांची मोठी कारवाई; १.४६ लाखांच्या मुद्देमालासह अवैध देशी दारू जप्त, तिघांवर गुन्हा दाखल

खोलापूर (अमरावती ग्रामीण) पोलीस स्टेशन अंतर्गत अवैध देशी दारू वाहतुकीवर मोठी कारवाई करण्यात आली असून, पोलिसांनी १ लाख ४६ हजार ८८० रुपयांचा मुद्देमाल जप्त केला आहे.

कारवाईची पार्श्वभूमी आणि घटना: अमरावती ग्रामीणचे पोलीस अधीक्षक निकेतन कदम यांनी अवैध दारू वाहतूक आणि विक्री करणाऱ्यांविरुद्ध कारवाई करण्याचे आदेश सर्व ठाणेदारांना दिले होते. त्यानुसार, ३ जुलै २०२६ रोजी खोलापूर पोलिसांना अवैध दारू वाहतुकीबाबत गुप्त माहिती मिळाली. माहितीच्या आधारे पोलिसांनी ‘ग्राम नावेड’ येथे नाकाबंदी केली.

नाकाबंदी दरम्यान, वाठोडा शुक्लेश्वर येथून एक बजाज पल्सर मोटारसायकल (क्र. MH 27 / DB 8457) अत्यंत भरधाव वेगाने आणि लोकांच्या जीवाला धोका निर्माण होईल अशा पद्धतीने येताना दिसली. पोलिसांनी तिला थांबवले असता, मोटारसायकलवर मागे बसलेला इसम पोलिसांना पाहून पळून गेला, तर चालकाला पोलिसांनी ताब्यात घेतले.

आरोपींची नावे:

१) राहुल लालजी थोरात (वय ३४ वर्ष, रा. वाठोडा शुक्लेश्वर, ता. भातकुली) – 

२) रोषन बंडु भटकर (रा. वाठोडा शुक्लेश्वर, ता. भातकुली) –.

३) वाठोडा शुक्लेश्वर येथील देशी दारू लायसन्स दुकानदार मालक.

जप्त केलेला मुद्देमाल: ताब्यात घेतलेल्या राहुल थोरात याच्या मोटारसायकलवरील तीन गोणपाटाच्या पोत्यांची झडती घेतली असता, त्यात देशी दारूचा साठा आढळून आला:

• देशी दारू: एकूण ७ पेट्या (प्रत्येक पेटीत १८० मिलीच्या ४८ बॉटल्स) – एकूण किंमत २६,८८० रुपये.

• मोटारसायकल: लाल-काळ्या रंगाची बजाज पल्सर (किंमत अंदाजे १,२०,००० रुपये).

• एकूण जप्त मुद्देमाल: १,४६,८८० रुपये.

गुन्हा आणि कायदेशीर कारवाई: आरोपी राहुल थोरात आणि फरार रोषन भटकर यांच्याविरुद्ध भारतीय न्याय संहिता (BNS) कलम २८१, १२५, ३(५) सह महाराष्ट्र दारू बंदी कायद्याच्या कलम ६५(अ), ६५(ई) नुसार गुन्हा दाखल करण्यात आला आहे.

तसेच, वाठोडा शुक्लेश्वर येथील लायसन्सधारक देशी दारू दुकानदाराने विहित परवान्यापेक्षा जास्त दारूची विक्री करून शासनाच्या नियमांचा व परवान्यातील अटी-शर्तींचा भंग केल्यामुळे, त्याच्यावरही महाराष्ट्र दारू बंदी कायद्याच्या कलम ८२, ८३ (ब) प्रमाणे कायदेशीर कारवाई करण्यात आली आहे.

कारवाई करणारे पोलीस पथक: सदर कारवाई अमरावती ग्रामीणचे पोलीस अधीक्षक निकेतन कदम, अप्पर पोलीस अधीक्षक दत्ता तोटेवाड आणि उपविभागीय पोलीस अधिकारी सतीश कुलकर्णी यांच्या मार्गदर्शनात खोलापूर पोलीस स्टेशनचे ठाणेदार स.पो.नि. अनुप वाकडे, पोहेकॉ शैलेश घुरडे (ब.न. १६८१), पोकॉ निखील (ब.न. ६२७), आणि पोकॉ वृंदावन (ब.न. ७३१) यांनी केली आहे.