अकोला सायबर पोलिसांची मोठी धडक कारवाई: गोव्यातून ५ सायबर गुन्हेगारांना अटक

अकोला जिल्हा पोलीस अधीक्षक अर्चित चांडक व अपर पोलीस अधीक्षक चंद्रकांत रेड्डी यांच्या मार्गदर्शनाखाली सायबर पोलीस ठाण्याच्या पथकाने आंतरराज्यीय सायबर गुन्हेगारांच्या टोळीचा पर्दाफाश करत गोव्यातून पाच आरोपींना अटक केली आहे. या कारवाईत तब्बल लाखो रुपयांचा मुद्देमाल आणि रक्कम जप्त करण्यात आली आहे.

कारवाईची सविस्तर माहिती आणि गुन्ह्यांचे स्वरूप:

• टाईल्स व्यापाऱ्याची ४.१९ लाखांची फसवणूक: अकोल्यातील एका होलसेल टाईल्स व्यापाऱ्याला व्हॉट्सॲपवर मार्केटपेक्षा कमी दरात माल देण्याचे आमिष दाखवण्यात आले. व्यापाऱ्याने ऑनलाइन आणि रोख स्वरूपात एकूण ४,१९,००१ रुपये पाठवले, परंतु माल मिळालाच नाही. याप्रकरणी १८ जून २०२६ रोजी सायबर पो. स्टे. येथे गुन्हा दाखल करण्यात आला होता.

• महिला डॉक्टरची ४५.६६ लाखांची ‘अल्गो ट्रेडिंग’ फसवणूक: अकोल्यातील एका नामांकित महिला डॉक्टरला व्हॉट्सॲपवरून ‘अल्गो ट्रेडिंग’ (Algo Trading) मध्ये मोठ्या परताव्याचे आमिष दाखवून सुरुवातीला २५ लाख रुपये गुंतवायला लावले. नफा झाल्याचे आभासी दाखवून आणखी पैसे भरण्यास सांगितले. जेव्हा डॉक्टर यांनी पैसे काढण्याचा प्रयत्न केला तेव्हा नकार देऊन आणखी २० लाख रुपयांची मागणी करण्यात आली. अशा प्रकारे एकूण ४५,६६,७५० रुपयांची फसवणूक झाली असून खदान पोलीस ठाण्यात गुन्हा नोंदवून तो सायबर पोलिसांकडे तपासासाठी वर्ग करण्यात आला.

  
  

  

  
  

गोव्यात छापा अन् ५ आरोपींना बेड्या:

सायबर पोलिसांनी तपासादरम्यान ७ बँक खाती फ्रीज केली आणि तांत्रिक विश्लेषणाच्या आधारे आरोपी गोव्यात असल्याचे निष्पन्न केले. २५ जुलै २०२६ रोजी पोलिसांचे एक विशेष पथक गोव्याला रवाना झाले:

1. नॉर्थ गोवा (हाईलँड विस्टा, अल्टो पचोरीम) येथून टाईल्स फसवणूक प्रकरणातील आरोपी:

   • यशपाल वासुदेवभाई निमावत

     
     

     

     
     

   • सोनु भवर कुमार यादव (दोघांना २९ जुलै २०२६ रोजी अटक)

2. पिलर्णे, बारडेज (नॉर्थ गोवा) येथून डॉक्टर फसवणूक प्रकरणातील आरोपी:

   • देवेंन्द्र सुरेशचंद्र शर्मा

   • अंकुर सुरेश चावडा

   • हबीबर रहमान फकरूद्दीन (तिघांना ३० जुलै २०२६ रोजी अटक)

जप्त केलेला मुद्देमाल:

• टाईल्स फसवणूक प्रकरण: २,५०,००० रुपये रोख रक्कम जप्त केली असून खात्यातील ७५,००० रुपये होल्ड (फ्रीज) करण्यात आले आहेत.

• डॉक्टर फसवणूक प्रकरण: २३ स्मार्ट मोबाईल, ९ की-पॅड मोबाईल, १ टॅब, १ मॉनिटर, ५ वाय-फाय राऊटर असा एकूण ६,२७,३०० रुपयांचा मुद्देमाल जप्त करण्यात आला असून ४,७९,४१० रुपये खात्यात होल्ड केले आहेत.

पोलीस प्रशासनाचे नागरिकांना आवाहन: कोणत्याही अनोळखी व्यक्तीच्या आमिषाला बळी पडू नका. शेअर मार्केट, कमी दिवसांत जास्त नफा, किंवा स्वस्त दरात माल देण्याच्या नावाखाली होणाऱ्या ऑनलाइन फसवणुकीपासून सावध राहा. अनधिकृत ॲप्स किंवा वेबसाईटवरून व्यवहार करू नका.

सायबर फसवणूक झाल्यास तातडीने १९३० या हेल्पलाईन क्रमांकावर किंवा www.cybercrime.gov.in या संकेतस्थळावर तक्रार नोंदवावी, असे आवाहन अकोला जिल्हा पोलिसांकडून करण्यात आले आहे.